Deporte e solidariedade únense este domingo en Ponteareas no Tea e o Uma

Este domingo, 29 de outubro, os que se acheguen até Ponteareas poderán descubrir parte do patrimonio natural do municipio nun roteiro que permite desfrutar das zonas que escaparon do lume. A andaina, que percorrerá 13,5 quilómetros, partirá ás 10:00 horas da mañá da Praza Maior e discorrerá por camiños tradicionais.

En concreto, os participantes cruzarán por San Roque para dirixirse á senda do río Tea ata a desembocadura do río Uma, pasando por Angoares. Dende ese punto, o roteiro sigue polo Uma ata a estrada que vai a Salvaterra seguindo o curso do río e pasando pola Ponte Cabalón, Fontenla subindo polo Penedo dos Namorados ata chegar ao Penedo do Equilibrio, continuando logo polo barrio da Serra en Arcos e de aí pasar polo barrio de Areal e chegar ao convento de Canedo para xa internarse no regato da Venda e subir ata á Praza Maior por San Gregorio.

A andaina é totalmente gratuíta e as interesadas e interesados soamente deberán achegar alimentos e artigos de hixiene persoal para o Centro de Reparto de Alimentos Municipal, que serán entregados antes do comezo. Aínda que de balde, é necesario inscribirse previamente nesta ligazón.

Antes do inicio explicaranse os lugares polos que transcorre a camiñada, destacando os puntos de interese paisaxístico, medioambiental e cultural.

O tramo longo, afectado pola vaga de lumes

O Concello de Ponteareas viuse na obriga de suspender a modalidade do tramo longo desta andaina que tiña un percorrido previsto de 25 quilómetros xa que discorría por zonas moi afectadas polo lume. Arestora, o Concello atópase á espera dos informes técnicos que avalíen como actuar na zona namentres se evita o paso masivo de grupos para non degradar máis o espazo natural.

Dejar un comentario

Tu dirección de correo electrónico no será publicada. Los campos obligatorios están marcados con *

*