A portavoz nacional do BNG, Ana Pontón, reivindicou a "vitoria" contra Altri nunha multitudinaria manifestación do Bloque en Santiago con motivo do Día da Patria, o 25 de xullo. "Hai un cambio en marcha imparable", advirte.
En declaracións aos medios, a líder do Bloque reclamou o dereito de Galicia, como "nación", a "construír un futuro mellor para todos e todas". Así, reivindica que os galegos e as galegas acadaron "fitos tan importantes" como "paralizar Altri": "Unha rotunda vitoria do pobo galego e unha derrota sen paliativos do PP".
- Te puede interesar: Caballero pide "implicación económica" a Diputación y Xunta para tener a vuelos a Londres, París o Bilbao
Ao respecto, advirte de que "a vitoria contra Altri é unha máis das que han vir porque neste país hai un cambio en marcha imparable que reclama un Goberno que defenda, por riba de todo e fronte a todos, os intereses dos galegos e das galegas". Por iso, aposta por un cambio de Goberno que defenda os servizos públicos, a lingua propia de Galicia e os dereitos das mulleres, entre outras cuestións.
"Queremos escribir a nosa propia historia e que Galicia teña voz propia neste mundo", afirma. Salienta que esta "nación valente", que "non foi escrita nun papel", é o "resultado de séculos de historia" e que "foi construída xeración tras xeración". "Mantense en pé porque, cando algúns quixeron silenciarnos, houbo xente valente disposta a defendela e, cando quixeron apagar a nosa voz, houbo quen falou máis alto", subliña.
"Existe unha sociedade farta dun Goberno popular que nos está deixando atrás e dun presidente que está a traballar en contra da nosa lingua, aquilo que máis nos une como sociedade", censura. Por iso, remarca que o Bloque ten unha "gran responsabilidade". "Somos a esperanza deste país". "Imos a por todas, cun BNG imparábel, deixándose a pel polos galegos e polas galegas", sentencia.
O futuro do galego
Preguntada polas palabras do presidente da Real Academia Galega (RAG), Henrique Monteagudo, nas que pide que os partidos políticos dialoguen e "se poñan de acordo" para sentar "as bases do futuro da lingua galega", Pontón lembrou que xa solicitara unha reunión co presidente da Xunta, Alfonso Rueda, para abordar esta cuestión. "Malia a súa negativa, seguimos coa man tendida para dialogar", afirma.
"Lamentabelmente, temos un presidente e un PP que seguen detrás da pancarta contra o galego", critica a portavoz nacional do Bloque, quen quere que o galego dure "mil primaveras máis".