FA é o novo traballo de Susana Seivane tras oito anos de silencio discográfico, un longo período que lle serviu de inspiración para a composición do seu quinto álbum. FA (Fiz e Antón) é unha profunda introspección no eido da maternidade, os convencionalismos, a familia e a plenitude persoal.
Sen perde-la súa esencia definitoria, Seivane explora novos ritmos imprimindo modernidade na tradición e erixíndose como unha das máis virtuosas gaiteiras de tódolos tempos.
Con temáticas universais como o amor superlativo, o medo, a inseguridade ou a felicidade absoluta, Seivane constrúe unha paisaxe sonora sen esquecer as súas raíces dotándoa de novos matices froito da súa madurez como compositora e instrumentista.
'Fa' sae hoxe, tanto na súa edición fisica, como nas plataformas dixitais habituais.
O novo traballo de Susana Seivane chegará o 22 de setembro a Ponteareas e o 16 de novembro a Vigo. No caso da urbe galega, a artista ofrecerá un concerto no Auditorio Municipal de Vigo, unha cita que é unha das máis destacadas da programación de Vigocultura 2018.
