Tui abrirá este venres o seu teatro para reflexionar sobre o noso camiño imparable cara a crise ecolóxica e medioambiental da man dun consumismo capitalista desaforado nunha vida chea de prisas e, tamén, de soidade. "O mel non caduca", a peza de Ibuprofeno Teatro mesturará retranca galega con doses de dura realidade para levarnos de novo ao teatro.
A cita comezará ás 21:30 horas dentro da programación do Outono Cultural de Tui. Ambientada nun universo de abellas e do mel nunha espectacular escenografía asinada por Diego Seixo, explora a relación do ser humano cos obxectos, a degradación ecolóxica do planeta, e a obsolescencia programada, tanto dos produtos coma das persoas.
Santiago Cortegoso é o autor e director desta peza teatral que combina dúas tramas unidas polo universo apícola. Dunha banda, dous científicos de 2173 levan a cabo sofisticados e absurdos experimentos, nun contexto de futuro distópico no que o planeta está arrasado. Tratan de crear unha abella a partir do último tarro de mel que se conserva na historia. Constrúen unha árbore no seu laboratorio para tratar de recuperar os ciclos naturais, que se perderon hai tempo.
Da outra, dous irmáns volven á casa familiar na aldea pola morte da súa nai. O conflito aflora cando deben xestionar as pertenzas familiares. O irmán máis vello opta por vendelo todo. A rapaza, máis nova, entra nunha crise vital porque se debate entre a súa acomodada vida nunha cidade afastada e a nostalxia que lle produce volver entrar en contacto cos obxectos e os recordos que marcan a súa historia vital.
As entradas para asistir á representación están xa á venda a través da web municipal a un prezo xeral de 8 euros e un reducido de 6 euros. Coas novas medidas que entraron en vigor o pasado sábado o aforo do teatro amplíase até o 85% é dicir, 470 butacas.
