Cangas volve ser o lugar perfecto para poder gozar do mundo do cómic. A localidade do Morrazo acolle durante toda a semana unha edición do Salón do Cómic e Ilustración, unha mostra que chega a súa maioría de idade. A cita, que mesturará o cine ca novena arte, terá lugar na Praza de Abastos dende este luns 16 ata o vindeiro domingo día 22.
Este luns será a inauguración, ás 19:00 horas, na Praza de Abastos e o martes xa arranca unha programación que ven cargada de actividades e talleres. Ademais, un dos grandes reclamos deste Salón do Cómic e Ilustración de Cangas é a presenza de cinco autoras invitadas como Bea Lema, Cristina Durán e Miguel Á. Giner Bou, Pacheco & Pacheco, Quan Zhou e Raquel Riba Rossy.
O evento contará cun obradoiro de cómic que contará coa presenza de José A. Calvo e Jorge Campos (martes, mércores e xoves ás 12:00 horas), cun certame de cosplay (mércores ás 18:00 horas no adro da Capela do Hospital) ou a presentación da revista "O Tebeo nº 8". Sen embargo, o Salón do Cómic e Ilustración de Cangas destaca pola proximidade cos grandes autores da novena arte grazas ós coloquios e ás sinaturas. Nesta edición, os asistentes poderan coñecer a Luis Davila, Guillermo, Cristina Durán, Pacheco & Pachecho, Quan Zhou e Bea Lema.
O cine tamén ten protagonismo no Salón do Cómic e Ilustración de Cangas.O programa inclúe proxeccións o mércores, o venres e o sábado. Os asistentes poderán ver "Kubo y las dos cuerdas mágicas", "Valerian y la ciudad de los dos mil planetas" e "Guardianes de la Galaxia vol. 2". As proxeccións deste "cine de verán" terán lugar ás 22:30 horas no adro da Capela do Hospital.
O domingo, último día do Salón do Cómic e Ilustración de Cangas, só estará dispoñible a exposición dunha cita que este ano cumple a súa maioría de idade.
O concelleiro de Xuventude, Andrés García Bastón, a técnica de Xuventude, Mercedes Lorenzo, e o colaborador José Antonio Calvo participaron no acto de presentación da 18ª edición do Salón do Cómic e Ilustración de Cangas
Horarios do Salón do Cómic e Ilustración de Cangas
Os asistentes poden asistir ó evento na Praza de Abastos de martes a sábado en horario de 12:00 a 14:00 horas e de 18:30 a 21:30 horas. O domingo, o horario do Salón do Cómic e Ilustración de Cangas será só de 12:00 a 14:00 horas.
