A Deputación aproba uns orzamentos expansivos para facer fronte á crise da Covid19 en 2021

O Pleno da Deputación de Pontevedra aprobou este venres os seus Orzamentos 2021, baseados no crecemento do investimento público, e concibidos como ferramenta para xerar actividade económica, emprego e cohesión social no marco da Axenda 2030, segundo explicou o voceiro socialista, Carlos Font. O Orzamento, que ascende 164,5 millóns de euros, saíu adiante con 16 votos a favor, sen votos en contra nin abstencións, xa que o PP abandonou a sesión ao non conseguir intervir cando o debate xa estaba rematado.

A actitude do Partido Popular foi obxecto de reproche por parte de Carlos Font. “As máis elementais normas da Democracia indican que, rematado o debate, non corresponde a ninguén máis intervir; isto é exactamente o mesmo que sucedeu no Parlamento de Andalucía cando un deputado de Vox, con moi malas maneiras, abandonou o Pleno”, expresou.

Másnoticias

Arrancan en Salvaterra las obras para mejorar el parque de A Canuda, con nuevos juegos

07/08/2025

Éxito de la Bienal de Pontevedra, con más de 48.000 visitantes en su ecuador

06/08/2025

Os Orzamentos provinciais aprobados hoxe supoñen un crecemento dun 2,2% sobre os actuais e sitúan a débeda provincial en 0,9 millóns de euros, fronte aos 41 millóns de euros do anterior Goberno no ano 2015. A Deputación defende que é a institución que máis aposta polo municipalismo, pois o nivel de transferencias aos concellos alcanza o 35,34% dos recursos totais, dobrando a media estatal, que se sitúa nun 18,24%. As achegas aos concellos alcanzan os 61,2 millóns de euros (un 9,68% máis) e volverán situar ao Plan Concellos como elemento tractor das infraestruturas, a dinamización e a contratación dos municipios de menos de 50.000 habitantes. O Plan adáptase “ao cambio de paradigma” para que os concellos poidan dedicar boa parte dos seus recursos a necesidades derivadas do combate contra a covid19. Segundo datos do Ministerio de Hacienda, citados por Font, a Deputación de Ourense transfire un 0,03% do seu Orzamento aos concellos e outras deputacións gobernadas polo PP como Almería, León ou Cuenca, tampouco chegan ao 1%.  "Trátase das mellores contas para a provincia porque converten aos concellos en protagonistas”, defendeu o deputado.

A Deputación acabará manexando un Orzamento superior aos 200 millóns ao longo do ano próximo grazas aos fondos europeos.

As contas apróbanse despois da polémica xurdida pola denuncia do PP sobre o gasto en órganos de Goberno. Font pechou o debate incidindo en que "o PP foi incapaz de xustificar as súas falsidades". O voceiro socialista defendeu, con datos do Ministerio de Hacienda na man, que o Goberno provincial supón un gasto dun 1,64% sobre o total do Orzamento, mentres en Ourense chega ata o 5,31%, e a media nacional está no 2,51%. Ademais, afeoulle ao voceiro do PP a súa reivindicación durante o debate do Plan de Acción Comunitaria, co que o anterior Goberno provincial subvencionaba a asociacións e entidades da provincia de maneira opaca. “Non pensei que tería que oír tal reivindicación dun plan caciquil, que repartía cartos aos amigos cun modelo que nada ten que ver co actual”. A este respecto pediulle ao PP que sexa “valente” e se atreva a pedir a volta “ao de antes”, acabando co Plan Concellos”. Lembrou que o último Goberno dos populares, hai só cinco anos, transfería 22 millóns aos concellos, en comparación cos máis de 61 millóns de euros actuais.

Pola súa banda, o voceiro do BNG, César Mosquera, defendeu o elevado gasto directo en favor dos concellos, sumando diversos servizos provinciais, ata os 75 millóns de euros e subliñou que, cando todo o mundo agardaba un Orzamento á baixa, o Goberno provincial foi quen de presentar unhas contas expansivas e que apostan polo gasto público e por políticas anticíclicas cando máis falta fai. Subliñou que chegan agora, e con anticipación, para dar aos concellos a información que precisan para elaborar os seus respectivos Orzamentos municipais, a pesar de que o máis cómodo tería sido agardar a que se clarexase a situación.

Mosquera foi moi crítico co Partido Popular por “falsificar datos” ao respecto da suposta subida de salarios no Goberno provincial. “Vostedes miraron as contas cos ollos cheos de sangue e, como non atoparon nada, fixeron unha noxenta interpretación das retribucións”. Ao respecto lembrou que no Pleno de Organización, en xullo de 2019, o PP “aplaudiu coas orellas” porque en poucas institucións a oposición dispón dun trato semellante (catro dedicacións retribuídas). “Hai que telos cadrados!”, concluíu.

O Goberno provncial volveu insistir en que a Xunta de Galicia asuma as súas competencias ao completo, en servizos como o Príncipe Felipe, a Escola de Cantería, O Areeiro ou Mouriscade. Se así fora, explican, a Deputación disporía de 20 millóns de euros máis que podería poñer a disposición do municipalismo.

A Axenda 2030 marca de forma transversal o orzamento no marco da Alianza Local #17ODS, é dicir, a estratexia da Deputación para captar fondos europeos cos que reforzar a transformación da provincia. Os Orzamentos abordan cuestións transversais como a transición ecolóxica, a dixitalización, a modernización dos sectores produtivos, o apoio á economía e os dereitos no rural, a igualdade, a mobilidade segura e creación de espazos amables, o apoio á cultura e o deporte, a transformación radical do modelo turístico e o apoio ao patrimonio e á lingua”. Ademais, como subliñou Font, o Plan Concellos permite a mobilización directa de 6 millóns de euros para axudar aos colectivos máis afectados pola pandemia.