Por ser exemplo de altura de miras e excelencia”, “por ter tomado decisións que marcaron as nosas vidas”, “porque a el se lle debe moito do prestixio que alcanzou esta institución”, “por ser parte esencial do mapa da UVigo...”. Por todo isto, a Escola de Enxeñaría de Telecomunicación e, o conxunto da Universidade de Vigo, rendeu homenaxe este luns ao catedrático, e exreitor, Domigo Docampo Amoedo (Redondela, 1954), quen tras unha intensa traxectoria profesional “na que tiven a oportunidade de gozar das tres vertentes da vida académica: a pesquisa, a administración, e, sobre todo, a docencia”, tal e como el mesmo subliñou, inicia agora unha nova etapa: a súa xubilación.

O acto, presidido polo reitor Manuel Reigosa, convocou a numeroso público no salón de actos da Escola de Enxeñaría de Telecomunicación. Ata alí se desprazaron moitos compañeiros docentes, alumnado e persoal técnico de administración e servizos de diferentes centros da UVigo, persoas que quixeron arroupar neste día a quen fora director da Escola Técnica Superior de Enxeñaría de Telecomunicación (1988-1990), director do Departamento de Tecnoloxías das Comunicacións (1991-1993 e 1996-1998) e reitor da Universidade de Vigo (1998-2006).

Másnoticias

A Universidade de Vigo dá a benvida ao seu alumnado sénior

26/09/2025

Surf, rafting o kayak, así es el Augaventura de otoño de la UVigo para todos los públicos

25/09/2025

Na súa intervención Docampo lembrou emocionado os seus inicios como docente nunha incipiente Escola de Enxeñaría de Telecomunicación, lembrando con agarimo a quen fora primeiro director deste centro, Aníbal Figueiras, doutor Honoris Causa pola UVigo falecido hai tres anos: “foi o meu mestre e amigo e del aprendín moito na miña carreira académica”. Admitiu sentirse “agradecido por todo o que hoxe se dixo aquí” e “moi afortunado” de ter vivido o que viviu, sobre todo no que se refire á docencia”, actividade coa que “tratei de espallar a paixón por saber, por coñecer e, por encima de todo, por entender”.

“A escola sempre será a túa casa”

Abriu o acto o reitor, Manuel Reigosa, quen non dubidou en afirmar que “a traxectoria de Domingo marcou indubidablemente a institución, marcouna para ben, e fíxonos colocarnos na modernidade”, ao que engadiu que “foi un xigante capaz de pór en órbita a Universidade de Vigo”, “unha persoa que sempre tivo carisma, visión e capacidade de liderado”.

Tras el, a actual directora da escola, Rebeca P. Díaz, foi a encargada de repasar brevemente a traxectoria de Domingo como docente e xestor, achegando tamén a súa visión como exalumna. “ É un docente que nos formou a moitas xeracións de estudantes do centro, cunha gran facilidade de palabra para explicar na aula”, subliñou Díaz, ao que engadiu que “para todos os que formamos a escola foi un orgullo que fose elixido dúas veces pola comunidade universitaria como noso reitor”. Ademais de darlle os parabéns pola súa xubilación en nome de todo o colectivo da EET, recordoulle que, se ben comeza unha nova etapa, “a escola sempre será a túa casa e o sitio onde volver a visitarnos sempre que queiras”.

“El espallou e regou as sementes da EE de Telecomunicación”

En nome do alumnado da primeira promoción de estudantes da escola tomou a palabra o catedrático da Universidade de Vigo Fernando Pérez González, primeiro estudante de doutoramento do profesor Docampo. “Para os alumnos desa primeira promoción, que comezou hai xusto 40 anos, Domingo non era un profesor coma os que tiveramos no instituto: enormemente motivador, capaz de saír do guión sempre que fixera falta e retando intelectualmente ao alumnado”. Lembrou tamén como a aqueles que decidiron facer a tese de doutoramento e apostar pola vida académica insistiulles con determinación en que fixeran estancias longas no estranxeiro para ampliar a súa formación. “Eu tiven a sorte de marchar a University of New Mexico a traballar nunha liña de investigación que el abrira co profesor Chaouki Abdallah, presente hoxe tamén neste acto, e ambos foron os meus directores de tese”. Como principais valores de Docampo, non o dubidou, “altura de miras e busca de excelencia”. Nesta liña, afirmou que “el espallou e regou as sementes da EE de Telecomunicación e a el lle debemos moito do prestixio que alcanzou este centro”.

Vídeo-homenaxe do alumnado da primeira promoción

As testemuñas dos egresados da escola chegaron tamén a través dun vídeo-homenaxe dos estudantes desa primeira promoción da escola, hoxe compañeiros de profesión. Entre as verbas que máis se escoitaron nestas mensaxes destacaron, sobre todo, a palabra, “grazas”, por todo o seu legado e a súa experiencia, e os bos desexos para a súa xubilación. Puxeron voz a esta particular homenaxe, impulsada pola delegación de alumnado da escola, os hoxe catedráticos da Universidade de Vigo José Luis Alba Castro e Artemio Mojón, así como Jesús Cid Sueiro, catedrático da Universidad Carlos III de Madrid, e Miguel Armesto Herbella, director xeral da construtora San José.

“No ano 1991 decidiches traer profesores de New México a impartir aquí cursos de doutoramento, unha decisión que foi moito máis aló que unha mera oportunidade académica e que marcou a miña vida”, salientou Alba Castro; mentres que Armesto Herbella amosou o seu orgullo por ter tido o privilexio de asistir como estudante ao nacemento da ETT e ser testemuña “do entusiasmo e determinación coa que aquel mozo profesor ao que mirabamos con admiración botaba sobre o seu ombro este proxecto”. Pola súa banda, Artemio Mojón puxo en valor o liderado de Docampo “nuns anos certamente intensos”.

“Non se limitou a administrar unha Universidade, construíu unha visión e un futuro para ela”

De lembrar a súa etapa como reitor encargouse o catedrático Óscar Rubiños, profesor da escola e vicerreitor do seu equipo de goberno. Na súa intervención recuperou diferentes testemuñas da percepción que a comunidade universitaria mantén desa época e os principios sobre os que se sustentaba o traballo daquel equipo. “Quero transmitir algunhas desas ideas que me fixeron chegar estes días: Domingo foi o arquitecto que moldeou a estrutura física e intelectual da Universidade de Vigo, un reitor que non se limitou a administrar unha Universidade, construíu unha visión e un futuro para ela; ou con el ao temón a sensación é que a nave mantiña un rumbo e avanzaba a toda vela”. Nesta liña, Rubiños deulle as grazas por permitirlle formar parte daquela aventura universitaria: “Todos tiñamos na cabeza un proxecto de universidade que compartiamos, o proxecto dunha universidade da que a sociedade do sur de Galicia e de Galicia en xeral se sentise orgullosa”, explicou Rubiños.

A maiores, o acto contou tamén coas intervencións do profesor Antonio Artés, catedrático da Universidad Carlos III de Madrid e membro fundacional do grupo de investigación do profesor Docampo, e Chaouki Abdallah, reitor da Lebanese American University, LAU, e colaborador de investigación do profesor Docampo durante as súas estadías na University of New México. Ambos contaron múltiples anécdotas e resaltaron a súa paixón pola docencia e a investigación, “sempre achegando novas ideas e puntos de vista”.