Alumnado da UVigo alíase co gañador dun Grammy Latino Jaime Navarro para editar unha canción

O álbum El Madrileño, de C. Tangana foi o traballo que consagrou o artista con raíces viguesas como un dos creadores máis innovadores do panorama musical español. Entre os múltiples premios que acadou o disco está o Grammy Latino á Mellor Enxeñaría de Gravación e un dos técnicos que o fixo posible é Jaime Navarro. Agora, este enxeñeiro está a colaborar cun grupo de estudantes da Universidade de Vigo no lanzamento de Sin el tiempo, unha canción que verá a luz o vindeiro 18 deste mes de abril.

Os impulsores desta iniciativa son Alejandro Fernández González, estudante de Enxeñaría Aeroespacial, baixista e compositor; Enzo Hernando Cunha, estudante de Bioloxía, produtor e compositor; Marcos Martínez Romero, tamén de Bioloxía, letrista, intérprete e compositor; Jorge Posada Durán, de Economía, que é batería e compositor; Uxía Táboas Currás, alumna de Enfermaría e intérprete e compositora e Alejandro Sirvent Ubeira, tamén de Bioloxía, que se encarga do asesoramento creativo. Eles mesmos defínense como un “colectivo creativo”, non como unha banda ao uso, e contan tamén coa colaboración de tres persoas alleas á UVigo: David Fernández González, guitarrista e compositor; Andrea Da Costa Pintado, que se ocupa do estilismo e asesoramento creativo e Alba Villaverde Rocha, deseñadora da identidade visual e asesora creativa.

Másnoticias

A Universidade de Vigo converte Lalín na capital galega da ciencia

30/05/2025

A Facultade de Comercio despide o seu referente, compañeiro e amigo, Patricio Sánchez Bello

28/05/2025

De Desvaríos Varios a Sin el tiempo

Explican que aínda que non operan como grupo dun xeito tradicional xa teñen algún traballo rematado que se publica baixo o alcume Vade (Marcos Martínez), que é o nome do letrista e intérprete como solista e acredítase individualmente a cada unha das persoas que traballou na publicación en base á súa aportación.

En concreto, en setembro de 2024 publicaron Desvaríos Varios, o primeiro álbum autoeditado, que como explican, “está principalmente fundamentado no son do rap, aínda que conta con moita variación entre pistas, chegando a atopar sons coma Mártir que é unha balada acústica sobre guitarra sen batería ou Fotos De Gatitos que é un reggaeton ambiental”. Agora teñen ante eles unha grande oportunidade, a de lanzar un tema cun “padriño” como Jaime Navarro. A peza, lembran, “foi gravada nun estudo improvisado que montou Jaime o pasado verán en Cambados”. Trátase dun funk carioca, “xénero que comezamos a explorar debido ás raíces de Enzo, cuxa familia materna é de Brasil”. Nesta peza en concreto participaron Enzo, Marcos e Uxía, aínda que só os dous mozos participaron na sesión de gravación.

Sobre como entraron en contacto co premiado enxeñeiro, lembran que todo naceu a raíz cunha amiga que facía prácticas nun xornal galego. “Enterouse da asistencia de Jaime a un evento con temática de cultura urbana que ía ter lugar en Cambados” e a partir de aí buscaron o xeito de achegarse a el. Dende a organización do evento déronlles a posibilidade de ensinarlle algún tema ou probar algo do que tiñan sobre unha das súas instrumentais propias, “pero finalmente dixéronnos que poderíamos ter a oportunidade de 1h íntegra para gravar totalmente gratis”. Apostaron por un tema que tiñan apartado, “que nos encantaba pero non sabíamos que facer con el, porque non nos encaixaba no EP de R&B no que estábamos comezando a traballar debido ao cambio de estilo sonoro”.

O tema, que ao fin atopou o seu sitio, lanzarase o vindeiro día 18 e agardan tamén que, ao longo do ano, se publique o álbum de R&B que están a piques de rematar. Farano sen discográfica, de xeito autónomo e cun contrato cunha distribuidora independente que xestiona o lanzamento así coma o tema de Copyright.

Unha experiencia dificilmente mellorable

Para o grupo de estudantes, a oportunidade de gravar con Jaime Navarro foi “unha experiencia dificilmente mellorable”. Resaltan que o trato pola súa parte “foi digno de admiración, non só é un gran profesional, como avala a súa carreira premiada con discos de platino e un Grammy, senón que o trato humano foi inmellorable”. Lembran que pasados un meses da gravación, “mantemos o contacto e, de vez en cando, asesóranos sobre os pasos que cree que debemos tomar, o cal é un privilexio enorme para nós”.