Desde Sada, Ribadeo, Silleda, Ourense, Cangas… máis 200 estudantes de ensino medio participaron este xoves no campus de Vigo nas III Olimpíadas Nacionais de Teleco, Teleco Games, unha cita na que loitan por conseguir un premio que os leve á final nacional, pero sobre todo, na que veñen a demostrar que son uns excelentes aprendices de enxeñeiros e enxeñeiras, e que están dispostos, “desde xa”, a pór sobre a mesa toda a súa creatividade e valía para demostralo. O primeiro obxectivo era prender neles o interese polas telecomunicacións e visto o entusiasmo posto en cada unha das presentacións, semella, a xuízo do equipo organizador, máis que cumprido.
Participaron 207 estudantes: 115 de Ensino Secundario Obrigatorio, 80 estudantes de Bacharelato e 12 de Formación Profesional. Divididos en 56 equipos, foron presentando os seus proxectos, tanto nos postos situados no corredor central da Escola de Enxeñaría de Telecomunicación, como no salón de actos. Fixérono ante un auditorio composto polos seus compañeiros de categoría do resto de centros participantes como polos representantes da organización, incluíndo responsables da escola e das catro empresas que apoian a competición: Indra e Oesía, a través ambas as dúas das súas cátedras, Televés e Borgwarner.
Un día “moi importante” e “ilusionante”
“Chegan coa ilusión de presentar os seus proxectos, nos que levan traballando varios meses, todos distintos: algúns máis innovadores, outros máis convencionais, uns máis sofisticados, sobre todo os elaborados por alumnado de Bacharelato e Formación Profesional, e outros máis sinxelos, pero igual de interesantes, propostos polos alumnos e alumnas de ESO”, explica a directora do centro, a profesora e investigadora Rebeca P. Díaz.
“Hoxe é un día moi importante para nós, xa que é a fin dunha etapa de traballo que comezou xa o ano pasado por estas datas”, salientou, ao tempo que puxo en valor o apoio das empresas, que é o que fai posible que se poidan levar a cabo este tipo de actividades. “Elas son as que financian os premios, 1.300 euros para cada unha das catro categorías, e os kits que se lles envían aos institutos, o que fai que o importe económico sexa elevado polo que non poderiamos asumilo sen elas”, subliñou a directora, ao que engadiu que “ogallá os equipos deste ano teñan o mesmo éxito ca os do ano pasado, cando tivemos equipos galegos nos podios finais das catro categorías”.
Proxectos TIC cos que garantir unha enerxía accesible e segura
Entre as principais novidades desta terceira edición destaca a posta en marcha dunha nova categoría: 1º-2º de ESO, coa que se busca motivar as vocacións entre o alumnado máis novo. Por outra banda, nesta ocasión os proxectos debían xirar en torno ao Obxectivo de Desenvolvemento Sostible 7, Enerxía alcanzable e non contaminante, e utilizar para conseguilo algún tipo de comunicación (wifi, bluetooth, etc.).
Enerxía fotovoltaica, sistemas de control enerxético de auga, biomasa, coches eléctricos, baterías de area…, finalmente presentáronse traballos de todo tipo nos que, con maior ou menor enxeño, se reflicte como as telecomunicacións poden contribuír a garantir o acceso a unha enerxía cada vez máis accesible, segura, sostible e moderna.
En cada un dos postos cada equipo presentaba con ilusión os seus prototipos. Desde o IES A Fariña, de Ourense, presentaron un dispositivo, bautizado como Ecocontrol, destinado a medir diferentes parámetros dun tanque de auga de xeito sostible, “xa que a electricidade que precisa para poder funcionar é xerada pola propia turbina instalada no depósito”. No caso do CIFP Ferrolterra presentaron un sistema de achique de auga para barcos autónomo: “o propio sistema detecta cando hai máis auga da debida e, automaticamente, manda unha sinal a un micro que activa unha bomba de auga que funciona ata que o nivel de auga volve ser o axeitado”, explica o docente que coordinou o traballo.
A polo podio nacional a finais de maio
Os mellores proxectos levarán diversos premios en metálico por valor de 5200 euros achegados polas catro empresas patrocinadoras. Ademais, terán tamén a posibilidade de representar a Galicia na final nacional, unha cita que se levará a cabo en liña do 21 ao 23 de maio para os equipos de bacharelato; o 26 e 27 nos casos dos centros de Formación Profesional e do 28 ao 30 para os da ESO.