As principais organizacións ecoloxistas do país súmanse ás demandas de Vigo Histórico

Vigo Histórico, a plataforma que busca paralizar o túnel baixo a Porta do Sol en favor dunha peonalización completa, vén de lograr o apoio das principais organización ecoloxistas do país. ADEGA, Greenpeace, Ecoloxistas en Acción, Amigos da Terra, Fridays For Future, Verdegaia asinaron un manifesto no que se sinala a “contradición” na que incorre o Concello de Vigo cando declara a emerxencia climática, pero a súa “medida estrela” é un túnel que mantén as emisións no centro da cidade.

No texto destácase que para peonalizar a praza, antes que construir un túnel, “hai que buscar medidas sostibles, que reduzan o tráfico, non que o perpetúen”. Os fondos europeos para desenvolvemento urbano sostible deben usarse, explican, para reducir as emisións, "non para construír infraestruturas para coches que perpetúen o tráfico, e que van en contra do obxectivo da futura lei de transición ecolóxica".

Másnoticias

Caballero avanza cómo será el recinto de grandes conciertos Vigo Arena: "Ya arrancó"

31/08/2025

Estas son las fiestas gastronómicas para saborear Galicia en la primera quincena de septiembre

31/08/2025

Así, as organizacións ecoloxistas sinalan que se “debería reforzar e mellorar o transporte público, con preferencia por flota eléctrica, crear mallas de carrís bici ou vías de velocidade reducida onde se poida circular en patinete ou en bici, ou promover cidades camiñables. O obxectivo debería ser reducir os traxectos en coche ao mínimo imprescindible, dando alternativas de transporte”.

“Os fumes baixo terra seguen sendo fumes”, argumentan nun manifesto que aposta por unha peonalización que elimine o tráfico de Porta do Sol “ de forma gradual”.

Segundo a futura lei de transición ecolóxica, as vilas de máis de 50.000 habitantes terán que poñer en 2023 restricións a certo tipo de vehículos en zonas de baixas emisións. En Vigo a lóxica apunta a que sexa o Casco Vello. Polo tanto, consideran os asinantes que “non ten sentido construír unha infraestrutura como o túnel baixo o barrio histórico, xa que terá aceso restrinxido a un porcentaxe elevado de vehículos dentro de tres anos, cando se remate a obra”.