Debate en Vigo sobre os fíos que tecen as redes sociais na comunicación institucional

Ademais de seren ferramentas para o entretemento e as relacións persoais, as redes sociais téñense consolidaron dende hai anos como mecanismos eficientes de comunicación institucional, e as universidades non son alleas a este fenómeno. En paralelo ás oficinas de prensa e de imaxe, case todas as universidades contan na actualidade con xestores de redes sociais institucionais que, dende o ano pasado teñen un punto de encontro do simposio Rederas. Despois dunha primeira edición en Murcia, este ano a organización do evento corre a cargo da Vicerreitoría de Comunicación e Relacións Institucionais da Universidade de Vigo. Dende hoxe e ata mañá venres, 33 responsables da xestión das redes sociais de universidades españolas danse cita neste foro que se celebra no edificio Redeiras para analizar os retos, novas tendencias e boas prácticas relacionadas co uso das RRSS como “canles imprescindibles para manter unha comunicación aberta e fluída coa comunidade universitaria”.

O encontro foi inaugurado pola vicerreitora de Comunicación e Relacións Institucionais, Mónica Valderrama, e polo presidente do Consello Social da UVigo, Ernesto Pedrosa. A responsable da organización deulle a benvida ás e aos asistentes e agradeceu o apoio do Consello Social para facer posible “esta reunión dos community manager das universidades españolas, que son a voz, o rostro oculto que está do outro lado das RRSS e dos soportes dixitais”. Valderrama recoñecía que ata hai relativamente pouco non se lle deba moita relevancia a estes medios, pero “as persoas que están hoxe aquí son moi importantes dentro dunha universidade”, porque se encargan de tecer redes cun perfil prioritario e primordial nas RRSS, o estudantado. A vicerreitora destacaba que os community manager “responden constantemente” as demandas dun grupo de poboación, o da xeración Z que, ao igual que os adolescentes de 12 a 17, “empregan as redes como buscador”, segundo se desprende un estudo IAB Spain presentado esta semana. Para Valderrama, este é un aspecto “moi interesante” e precisamente será un dos temas que se tratarán neste foro.

Másnoticias

A Aula de Música Tradicional compartirá escenario con Carlos Núñez en Pontevedra

20/12/2024

A UVigo mantén en 2025 o equilibrio orzamentario cun presuposto de 248,3 millóns de euros

19/12/2024

Pola súa banda, o presidente do Consello Social recordaba que “entre os maiores obxectivos aos que debe aspirar unha universidade está o recoñecemento, o aprecio e a confianza da sociedade que a sostén, porque é aí onde se xogan os seus resultados e tamén os seus recursos, é onde está a base de todo o demais”. Para acadar este recoñecemento, Pedrosa considera esencial a visibilidade, “unha visibilidade que se consegue a través da comunicación”, convertendo as propias institucións “nun material informativo fluído e transparente para que a sociedade as entenda, as integre, as queira e as senta útiles”. Tamén trasladou o seu desexo de que exista “unha militancia” coa universidade, “para que se sinta como un patrimonio colectivo” e avogou por construír esta adhesión co “material de máis alta resistencia, o afecto, quizais o que máis precisan hoxe en día as universidades xunto co recoñecemento”.

Dous días e catro eixos temáticos

O encontro, que se desenvolve ao longo da xornada de hoxe xoves e na mañá deste venres, estrutúrase en catro eixos temáticos: Novas narrativas e tendencias; Como medimos en redes sociais?; Intelixencia artificial e Boas prácticas. Tras o acto de apertura arrancou o primeiro dos bloques, da man de Ferrán Llunell, da Universitat Pompeu Fabra e Amparo Soriano, da Universitat Jaume I, que falaron sobre os novos horizontes na busca de información que van máis aló de Google; e de Pepa González Oliva, da Universidad de Castilla-La Mancha, que se centrou no presente, o futuro e a morte das redes sociais. A mañá completouse coa intervención de Mercè Guillén, da Universitat Oberta de Catalunya, que foi a encargada de falar sobre como medir as redes sociais.

A xornada de tarde trasládase ao campus e, tras unha visita ao Anfaco da Industria Conserveira, comezará a sesión sobre a intelixencia artificial, na que intervirán Itziar Romera Gómez, da UNED, que falará sobre IA e a as novas ferramentas informativas nas universidades e nos centros de investigación; e Emmanuel Joven, da axencia Bap Conde, que analizará o potencial da IA xenerativa para creadores de contidos. Tamén neste bloque tomará a palabra Javier Moñino, da Universidad Católica San Antonio de Murcia, para debater sobre Copilot como ferramenta para crear contido en redes sociais de universidades. O programa do hoxe pecharase coa intervención como conferenciante convidado de Pablo Vilar Pequeño, da axencia Marco, cun relatorio titulado Tempo real e mundo real: rapidez + contexto en RRSS.

Mañá venres o foro regresará ao edificio Redeiras, cunha sesión sobre boas prácticas na que se presentarán exemplos de traballos e propostas postos en marcha polas universidades participantes. Neste bloque, Rodolfo Martínez Gras, da Universidad de Alicante, presentará a II Enquisa a profesionales da comunicación en RRSS de universidades españolas, mentres que Itziar Romera Gómez, da UNED, falará sobre IA aplicada aos departamentos de comunicación e RRSS. Pola súa banda, Amparo Soriano, da Universitat Jaume I, presentará o proxecto ComuniCAUJI. Ambaixadores i ambaixadors del campus, mentres que a vicerreitora da UVigo, Mónica Valderrama, a miniserie de TikTok da UVigo, UVigoShow. O encontro pecharase con outra conferencia convidada, desta volta, da man de Xiana Vidal, da Agencia trend, que falará sobre contido creativo en redes sociais.