Eleccións: O BNG creará o "Galtren", un tren de proximidade que comunicará Vigo con Pontevedra ou Tui

“A partir do vindeiro 12 de xullo vai haber na Xunta de Galiza un goberno do BNG presidido por Ana Pontón que será un goberno aliado de Vigo e que traballará a favor de Vigo”. Así o manifestou hoxe na cidade olívica o cabeza de lista do Bloque, Luís Bará, -acompañado polas tamén candidatas Alexandra Fernández e Carmela González, e polo portavoz municipal Xabier P. Igrexas- onde plantexou rematar cos once anos de abandono do Partido Popular e poñer en marcha un ‘Plan Vigo’ de investimentos e obras de mobilidade e infraestruturas.

Segundo explicou Bará, o BNG pretende activar a área metropolitana de Vigo como o grande motor de cooperación con todos os concellos da contorna para impulsar a área de influencia e a cidade. Desenvolverá para iso un plan integral de mellora da mobilidade e das infraestruturas, “un Plan Vigo de investimentos en obras que son necesarias e que foron paralizadas polo Partido Popular”, abondou.

Másnoticias

Ikea pone fecha a su apertura en Vigo y lo celebra con degustación gratuita de galletas en Vialia

20/08/2025

Amenazan al Concello de Vigo con acciones legales por dañar árboles al instalar las luces de Navidad

20/08/2025

O Plan Vigo, segundo Bará, desenvolverase nos vindeiros anos en catro grandes ámbitos. O primeiro pasa polo fomento do ferrocarril, “que é a fórmula de mobilidade do futuro”, creando un ‘Galtren’ que dinamice o tren de proximidade para comunicar Vigo con Pontevedra, con Tui e co resto do país. O segundo punto, dixo o nacionalista, céntrase no impulso do transporte público por estrada implementando o Plan de Transporte da Área Metropolitana, “paralizado ata agora polas liortas partidistas entre o PSOE e o PP”, e tamén mellorando as comunicacións da cidade de Vigo con dous polos de grande dinamismo como o CUVI e o aeroporto de Peinador.

En terceiro lugar, Bará destacou a necesidade de impulsar o transporte marítimo de ría como unha alternativa sustentable para o tráfico a motor: “Haberá incentivos e tamén máis servizos dentro da ría de Vigo”, dixo. Por último, o cabeza de cartel destacou que o BNG desenvolverá dende a Xunta un plan de investimentos para mellorar a rede viaria con dúas actuacións que son clave, como a construción do túnel de ‘Julián Estévez’ para mellorar as comunicacións do barrio de Teis e tamén co campus da ETEA, e a urbanización da PO-330 en Pereiró, “unha obra tamén adiada polo desleixo da Xunta do Partido Popular”.

Outro dos aspectos que Bará puxo sobre a mesa é que o goberno do BNG liderado por Ana Pontón “tamén será un goberno que impulse e negocie co goberno central actuacións que serán centrais para mellorar as comunicacións de Vigo coa área xeográfica e o resto de Galiza”. Nomeadamente citou o rescate da AP-9 e inmediatamente a gratuidade do treito entre Redondela e Vigo, así como a urbanización do tramo urbano que atravesa a parroquia de Teis.

Finalmente anunciou que o BNG tamén implantará un plan de mellora de transporte de mercadorías por ferrocarril conectando o Porto de Vigo e todos os nodos loxísticos da área coa rede do corredor Atlántico de mercadorías por ferrocarril.

Logo de poñer sobre a mesa toda a batería de propostas para Vigo e a súa área Bará subliñou que o resultado do 12X está aberto. Insistiu en que “hai partido” e que é preciso que toda a xente que quere un cambio para Galiza vaia votar e non quede na casa. “Se a veciñanza de Vigo que quere o país, que quere un cambio, vai votar o 12X e concentra o seu voto no BNG, que é a alternativa real a Feixóo, faremos historia porque Ana Pontón será a primeira presidenta nacionalista da historia deste país”, subliñou.