Esixen ceses no Concello de Vigo pola “nefasta xestión” dos servizos de Incendios e Policía local

Representantes da CIG, CUT e CCOO no Concello de Vigo compareceron hoxe en rolda de prensa para esixir o cese de Elena Espinosa e dos funcionarios adscritos de xeito provisorio ao Servizo de Prevención, Extinción de Incendios e Salvamento (SPEIS) e á Policía local pola “nefasta xestión” destes dous departamentos.

Dende as centrais denuncian incumprimentos da legalidade no SPEIS -mesmo negándose a acatar sentenzas xudiciais- e políticas internas de “premio e castigo” no corpo policial. En concreto, critican o “absoluto desprezo” que a Concellaría de Seguridade, que dirixe Elena Espinosa, vén amosando non só ao cumprimento da legalidade aplicable en distintas materias, senón, incluso a respecto de distintos pronunciamentos xudiciais que están sendo emitidos polos tribunais.

Másnoticias

Un cine en plena naturaleza en Vigo para disfrutar de las películas más comprometidas

31/08/2025

Una fiesta en Vigo promete tres grandes verbenas y un pregón muy "celtista"

31/08/2025

Neste senso, lembran as catro sentenzas no contencioso administrativo que confirmaron a
“absoluta vulneración” da lei na que incorreu o decreto municipal que en 2019 acordou a “ilegal suspensión” dos descansos regulamentarios dos funcionarios do SPEIS. Sen embargo, e a pesar deses pronunciamentos xudiciais anulatorios, a actual concelleira segue a aplicar esa “resolución ilegal”, segundo denuncian os representantes sindicais.

Outra sentenza da mesma orde xurisdicional, ditada en primeira instancia, declarou igualmente a nulidade de pleno dereito do decreto que deixou sen efecto o exercicio lexítimo do dereito á folga convocada por dous sindicatos hai un ano. “Decreto que, a sabendas da súa ilegalidade, segue manténdose tamén no tempo impedindo aos funcionarios/as deste servizo o exercicio dun dereito constitucional”, explican.

Ao mesmo tempo, outras dúas sentenzas da orde contencioso administrativa, ditadas en primeira e segunda instancia, confirman tamén que o Concello está a abonar os reforzos de xornada dos bombeiros por debaixo do prezo da hora de traballo regulamentariamente establecida.

Outra das cuestións sobre as que inciden ten que ver co que consideran unha total falta de compromiso á hora de ofrecer unha solución legal e efectiva á "problemática organizativa que se deriva da falta de medios humanos no SPEIS". Tamén critican o deseño dunhas bases de selección para as prazas do SPEIS, na actual oferta de emprego que se está a tramitar, de "moi dubidosa legalidade". Entre outras cousas porque se cambiou, "sen a debida xustificación", o sistema de selección que se empregou ao longo de décadas, que pasou dunha oposición libre (o mecanismo que marca a lei como preferente) ao de concurso-oposición.

Ademais, denuncian o trato preferente que se deseñou nas bases de selección en favor de distintos colectivos funcionariais para acceder ás prazas de bombeiros. Por exemplo, respecto dos funcionarios da UME, aos que se lles priman os servizos prestados nas forzas armadas situándoos nunha posición de privilexio de méritos fronte a outros candidatos para acceder ao corpo de bombeiros de Vigo.

En canto á xestión da Policía local, denuncian as políticas internas “de premio e castigo” que están sendo impostas pola Xefatura do corpo aos seus subordinados. Consideran inadmisíbel que os funcionarios sexan postos ou depostos discrecional ou arbitrariamente dos seus postos de traballo como consecuencia de políticas internas “baseadas en criterios paralegais” que nada teñen que ver cos principios de mérito, capacidade e igualdade, segundo denuncian.