O BNG de Vigo denuncia graves defectos e atrasos na tramitación do Ingreso Mínimo Vital

O Bloque Nacionalista Galego denunciou esta mañá en Vigo as "graves eivas" na tramitación das solicitudes do Ingreso Mínimo Vital (IMV). En rolda de prensa, o concelleiro do BNG na cidade olívica, Xabier P. Igrexas, criticou "a violencia burocrática" no que cualificou de "xestión desastrosa".

Igrexas subliñou que na cidade hai, segundo o índice Arope, máis de 60 mil persoas en risco de exclusión social e pobreza. Neste contexto, agravado polos graves efectos sociais da crise derivada da pandemia do coronavirus, xulgou inaceptábel a elevada demora na tramitación do IMV e os erros na súa resolución.

Másnoticias

Dos detenidos en un día en Vigo como presuntos autores de un delito de violencia de género

27/06/2025

El ciclo de conciertos que llena de música en directo Galicia crece en Vigo hasta el mes de octubre

27/06/2025

Nos últimos datos oficiais dispoñíbeis, do 19 de outubro do 2020, na provincia de Pontevedra realizaranse 13.194 solicitudes do IMV, das que se estima preto da metade corresponderían á cidade de Vigo. Destas máis de 13 mil demandas unicamente se resolveron 2.320. "Oito de cada dez solicitudes seguen sen atender, o que é o mesmo que dicir que oito de cada dez persoas que precisan unha axuda social de emerxencia segue a esperar por recibila", afirmou Igrexas.

Aliás, o portavoz municipal nacionalista asegurou que a escasa tramitación está verificada no cativo descenso no número de persoas beneficiarias da Risga. "O Ingreso Mínimo Vital debera permitir superar a Risga, pero vemos como en Vigo pasamos de preto de 2.500 perceptoras da renda galega a 2.155. Isto é, que só 350 viguesas e vigueses pasaron da Risga ao IMV", explicou.

Desde o Bloque defenden que para que o IMV sexa "unha ferramenta útil para as persoas empobrecidas e en situación de exclusión social é preciso que se despreguen medidas que garantan a súa eficacia". "De nada serve recoller dereitos no BOE se despois non se fan realidade", reprochan reclamando que aumenten os medios materiais e humanos para axilizar a tramitación das axudas.

Despois de cualificar de "verdadeiro desastre de xestión dunha axuda que é máis necesaria que nunca", Igrexas lamentou as expectativas frustradas das persoas que a solicitaron. Neste sentido, denunciou a "violencia burocrática" que se está exercendo contra os colectivos máis vulnerábeis na tramitación do IMV. Unha "violencia" que, segundo argumentou, se manifesta en forma nunha "demora case eterna na resposta á solicitude dos recursos", na emisión de resolucións incorrectas, con persoas que perciben a metade do que lles correspondería, e na denegación "inxustificada" do IMV por causas subsánabeis. "Para o BNG é inconcibíbel que se denegue o acceso a unha axuda social de emerxencia como o IMV polo feito, por exemplo, de que unha das persoas da unidade familiar non figure inscrita como demandante de emprego. En calquera procedemento administrativo cabe a subsanación de erros, non entenedmos porque aquí se opta polo carpetazo", lamentou.

O BNG de Vigo vai dar traslado desta situación, que afecta de maneira moi especial á cidade, ao deputado da formación nacionalista no Congreso, Néstor Rego, cun duplo obxectivo. Dunha banda, demandar transparencia, solicitando que se fagan públicos os datos reais da tramitación do IMV desagregados por concellos. E por outra, urxindo o Goberno español de coligazón entre PSOE e Unidas Podemos a adoptar as medidas "organizativas ou normativas necesarias" para corrixir esta situación e facilitar o acceso ao IMV ás moitas persoas que o precisan.

Erro nas contías

Canda Igrexas compareceu a veciña, Consuelo Lago, que fai parte activa dos movementos sociais da cidade e que é actualmente beneficiaria do IMV. Lago denunciou publicamente que percibe 455 euros cando pola súa situación, como nai dunha familia numerosa monoparental, lle deberían corresponder 975 euros.

Lago chamou o Goberno español a escoitar as persoas demandantes da IMV e a actuar para corrixir as deficiencias que hai na tramitación e que afectan de maneira grave a familias que necesitan axuda para poder subsistir. “Despois de nove meses merecemos unha reposta”, remachou.

Tampouco se están a actualizar as contías que foron fixadas tendo en conta os ingresos declarados en 2019 a pesar de que a situación económica do 2020 foi para moitas das beneficiarias moito peor.