O BNG de Vigo "esíxelle" a Autoridade Portuaria que "desista definitivamente" de realizar novos recheos

Despois da celebración do primeiro Consello de Administración da Autoridade Portuaria de Vigo con Carlos Botana como novo presidente, o Bloque Nacionalista Galego vén de dirixirlle un escrito trasladándolle catro cuestións “da máxima importancia” para avanzar cara a un porto máis sustentable en termos ambientais e mellor integrado na cidade.

A primeira cuestión trasladada polo portavoz municipal do BNG de Vigo, Xabier P. Igrexas, na misiva é a "esixencia de que a Autoridade Portuaria desista, definitivamente, dos proxectos de novos recheos en Bouzas que suporían preto de 70 mil metros cadrados de novos aterramentos".

Másnoticias

Dos detenidos en un día en Vigo como presuntos autores de un delito de violencia de género

27/06/2025

El ciclo de conciertos que llena de música en directo Galicia crece en Vigo hasta el mes de octubre

27/06/2025

Igrexas chamou tamén a avaliar a posibilidade técnica de reverter o último recheo de 8 mil metros cadrados nas inmediacións do Berbés, que inda non está consolidado e que “carece de motivación e supón unha grave agresión ambiental”. “A cidade xa lle gañamos ao mar máis de 3 millóns de metros cadrados e non podemos seguir cementando un ecosistema tan valioso, do punto de vista ambiental pero tamén da actividade económica, como é a Ría de Vigo”, afirmou.

En relación a isto, no segundo punto o edil nacionalista afirma que a aposta polo crecemento ordenado e sustentábel da actividade portuaria en termos loxísticos “ten que pasar, si ou si, pola reordenación dos usos da lámina portuaria, a través dunha Delimitación de Espazos e Usos que sigue pendente” e tamén polo desenvolvemento efectivo da Plisan, para que “funcione como verdadeiro porto seco de Vigo”.

Fin das verteduras

En terceiro lugar, o BNG reclámalle ao presidente da Autoridade Portuaria un "verdadeiro compromiso para poñer fin ás verteduras de augas sen depurar, tendo en conta que o 90% destes vertidos se producen desde a lámina portuaria". “Non podemos converter o noso litoral nunha enorme cloaca”, enfatizou Igrexas.

Por derradeiro, a carta subliña que “é momento de recuperar a cooperación institucional entre o Porto e o Concello de Vigo para avanzarmos cara a unha mellor integración da realidade portuaria na cidade". No concreto, Igrexas sostén que “é imprescindíbel que se abra de inmediato un diálogo real para abordar a desafección portuaria de zonas que arestora teñen un uso claramente urbano e non portuario”, como é o caso da praia de Mende en Teis e diferentes parcelas dotacionais en Bouzas.