O BNG vigués urxe a apertura do Centro Galego de Fotografía e Cinema

O BNG urxe abrir o Centro Galego de Fotografía e Cinema. O concelleiro Xabier Pérez Igrexas non só rexeita a idea de que o edificio sexa unha sede da Deputación de Pontevedra, senón que invita ao Goberno municipal de Abel Caballero que o reloxo que vai instalar en Porta do Sol para contar os días que restan ata o acendido do Nadal a que esa conta atrás “conte os días que falten para poñer en marcha, para abrir dunha vez por todas, o Centro Galego de Fotografía e Cinema da rúa Chao”. O edil nacionalista lembrou que ese espazo estivo aberto apenas tres meses e que leva máis de catro anos pechado, despois dun investimento de case dous millóns de euros.

Xabier Pérez Igrexas considera que a situación de total abandono do Cafvi é “un exemplo clamoroso da política de desertización cultural que practica o PSOE”. “A este Goberno municipal nada lle interesa a cultura, só lles interesa a fanfarria que xere titulares e que permita que o alcalde continúa na súa xira polos platós das televisións españolas para maior autobombo”, reprochou.

Másnoticias

El entrenador acusado de abusar de una menor en Vigo afirma que las relaciones fueron consentidas

03/04/2025

Acepta un año y medio de cárcel tras amenazar con una pistola a un conocido en Vigo

03/04/2025

O BNG de Vigo expresa o seu rexeitamento a que este inmoble no Casco Vello se destine a un uso diferente que para albergar o Centro Galego de Fotografía e Cinema para o que foi deseñado. Unha instalación que “permitiría poñer en valor e permitir o acceso social aos valiosísimos fondos fotográficos dos que conta a cidade e que fican a escuras” e que representaría “un instrumento para dinamizar unha disciplina artística na que Vigo ten moito que facer, e na que a nosa cidade podería estar no mapa internacional”.

Deste xeito, desde a fronte nacionalista descartan que o edificio se poida dedicar para unha oficina administrativa ou sede institucional da Deputación de Pontevedra. “Para que necesita a Deputación unha sede en Vigo? Se o que queren é unha sede máis para o PSOE que a pague o PSOE. Non hai ningunha xustificación, nin ningunha necesidade, como se demostrou durante estes anos nos que a sede do antigo reitorado estivo practicamente inoperante”, afirma Pérez Igrexas.

O edil nacionalista apunta que a posición do BNG sobre as deputacións é clara. “Aportamos pola súa desaparición”. Neste sentido, Pérez Igrexas sinalou que mentres non desapareza este “ente anacrónico e sen función real” a contribución do BNG está a ser a deixar baleira de contidos e competencias estas institucións provinciais para transferir os seus recursos aos concellos “que son os que teñen capacidade para actuar”. “Se hai un ámbito en toda a provincia de Pontevedra onde é evidente que a Deputación non ten ningunha razón de ser é a cidade de Vigo, e por iso non podemos compartir que se queira destinar un edificio deseñado para albergar un grande centro cultural para lle colocar un despacho e unha sala de recepcións á presidenta da Deputación de Pontevedra”, concluíu o edil do BNG na cidade.