Últimos días para solicitar as bolsas de prácticas en Portugal da Universidade de Vigo

Por segundo ano consecutivo a Universidade de Vigo convoca as bolsas de prácticas Alén do Miño, un programa dirixido a fomentar a formación transfronteiriza do alumnado e no que se combina un obradoiro formativo en interculturalidade coa realización de prácticas académicas, curriculares ou extracurriculares, en empresas e entidades portuguesas. Trátase de axudarlles aos alumnos e alumnas interesados en facer prácticas profesionais ‘alén do Miño’ a sufragar parte dos gastos ocasionados pola mobilidade desde o seu lugar habitual de residencia. A contía máxima de cada axuda é de 600 euros ao mes.
As persoas interesadas en solicitar estas bolsas poderán facelo ata o vindeiro mércores 3 de maio. Xunto coa solicitude deberase enviarse unha carta de pre-aceptación da empresa/institución na que se inclúa o programa das prácticas, vencellado coas competencias da titulación universitaria cursada, e as datas previstas da estadía.

Convócanse un total de cinco axudas, unha por cada rama de coñecemento: ciencias sociais e xurídicas, arte e humanidades, ciencias, ciencias da saúde e enxeñaría. O programa desenvolverase en dúas fases: unha primeira parte de formación, que se vai impartir nas propias instalacións da UVigo, e que consiste en 10 horas de clase nas que se impartirán contidos relacionados coa cultura portuguesa e co feito de traballar e formarse en Europa; a segunda fase, refírese xa á realización das prácticas académicas externas nalgunha empresa ou institución da súa elección, xa sexa unha organización pública ou privada, incluíndo fundacións, organizacións, asociacións ou ONGs sen ánimo de lucro.

Másnoticias

A UVigo reivindica “a teima por imaxinar” de Isaac Díaz Pardo

09/06/2025

A UVigo pon en marcha un título propio de Experto en Auga, Termalismo e Saúde

06/06/2025

As persoas beneficiarias estarán baixo a titoría das persoas da Universidade e da empresa que se designen no momento de formalización da práctica e elas serán as que se responsabilizarán da formación impartida, do desempeño da actividade de colaboración e da orientación no desenvolvemento da axuda. De feito, tal e como se especifica na convocatoria das axudas, “o contido do plan formativo das prácticas externas será o que, de común acordo entre os titores académicos e de empresa, se estableza para cada beneficiario e deberá fixar os obxectivos educativos e as actividades a desenvolver, considerando as competencias básicas, xenéricas e/ou específicas que debe adquirir o alumno ou alumna durante o período de prácticas”.

O período de prácticas da segunda fase do programa terá unha duración máxima de 2 meses, e poderán desenvolverse entre o 1 de xuño e o 15 de setembro.