Unha orquestra para a Universidade de Vigo

Promovida pola Vicerreitoría de Extensión Universitaria “co obxectivo de crear un espazo musical participativo e integrador aberto a toda a comunidade”, como explica a súa responsable, Susana Reboreda Morillo, a UVigo conta, por vez primeira na súa historia, cunha orquestra integrada por unha trintena de persoas, na súa maioría estudantes e tamén algúns docentes e investigadores e investigadoras.

“Aínda que hai anotadas á orquestra, con intención de participar activamente nela, arredor dunhas 30 persoas, empezamos a ensaiar a semana pasada unhas 20, por cuestións de repertorio e plantilla instrumental necesaria para o mesmo”, explica Raquel Carrera Álvarez, directora da formación e exalumna da UVigo. “Este primeiro ensaio foi unha mostra do entusiasmo e compromiso das persoas participantes”, destaca a directora da orquestra, que explica que a formación arrincou cun repertorio formado por obras de Haydn, Gluck e Bartók, “que nos permite medrar como grupo humano moi variado, tanto de idades e experiencia e ilusionado, con ganas de aprender e compartir música e iso é a mellor garantía para que este proxecto se consolide”.

Másnoticias

La Semana de Cine Submarino de la UVigo vuelve en otoño con proyecciones en una nueva ubicación

13/10/2025

Oposiciones para la UVigo, la OPE contará con 72 nuevas plazas de personal docente e investigador

10/10/2025

Ofrecer un espazo artístico, fomentar a convivencia, o traballo en equipo e a conexión entre os diferentes campus da UVigo son outras razóns que impulsaron a posta en marcha desta iniciativa da Vicerreitoría de Extensión e que se suma á oferta musical da UVigo, que xa conta con tres coros.

Base de corda e instrumentos de vento

Mentres a orquestra segue aberta a novas incorporacións, os ensaios comezaron no edificio Redeiras cunha base sólida de corda, con violíns, violas e cellos, ao tempo que tamén comezaron a incorporarse instrumentos de vento, como frautas e clarinetes. En canto á formación das e dos seus integrantes, Raquel Carrera explica que todos teñen coñecementos musicais, “a maior parte proveñen de ensinanzas regradas (conservatorios), pero non todos. Algúns, por exemplo, estudaron música hai tempo e grazas a iso agora retoman o instrumento que collía po nalgún armario. Outros, comezaron o estudo dun novo instrumento, orquestral, e anímanse a vir para aprender máis e tamén vivir a experiencia orquestral, que lles é nova”.

Iso si, en todos os casos cómpre, para integrarse na formación, ter algúns coñecementos musicais, cando menos básicos e un mínimo de destreza co instrumento. “Sexa cal sexa o se nivel de experiencia, poden anotarse e participar. Só hai que poñerse en contacto a través do correo extensión@uvigo.gal”, explica a directora da orquestra.

Continuar coa música orquestral

En Galicia só a Universidade de Santiago de Compostela conta cunha orquestra e esta foi unha das razóns que levaron a Raquel Carrera a impulsar un proxecto que agora bota a andar. “Pensei que a UVigo tiña ‘dereito’ a poder ofrecer esa experiencia a súa comunidade educativa, que había un espazo que encher”, explica a directora, que como profesora de violín, miraba tamén como seu alumnado, ao rematar os seus estudos medios no conservatorio tiña que escoller entre seguir coa súa formación musical en conservatorios superiores ou ir á universidade, “ e cando optaban polo último, ían deixando paulatinamente este contacto coa música e o seu instrumento. Non obstante, eu vía como aqueles que ían estudar a universidades nas que si existía orquestra universitaria podía polo menos continuar aprendendo e facendo música orquestral, sen desvincularse dese mundo nin perder de todo as habilidades técnicas que estiveran cultivando e nas que estiveran traballando desde os oito anos de idade”.

Carrera, que agradece o apoio da vicerreitora de Extensión, Susana Reboreda, e do técnico da Área de Cultura, Alfonso Caride, “cuxo impulso e compromiso resultan fundamentais para que esta iniciativa se faga realidade”, avanza que a orquestra continuará cos seus ensaios semanais cara á preparación dun primeiro programa que se presentará ao longo do curso académico 2025/2026. Graduada superior en violín, Raquel Carrera ten un Mestrado en Investigación Musical e outro en Dirección de orquestra. Actualmente está a cursar o Grao Superior en Dirección de orquestra e traballa dende 2008 como profesora de violín e orquestra no Conservatorio Profesional de Música de Ourense.