O BNG emprega a letra do tema de Eurovisión de España como exemplo de sexualización da muller

O BNG presentou este xoves a súa campaña con motivo do Día da Muller, o 8 de marzo, que este ano se centra na denuncia da cosificación e a sexualización da muller, que exemplificaron coa letra de 'SloMo', canción seleccionada para representar a España en Eurovisión e cuxa letra "incide en dar unha imaxe estereotipada das mulleres".

A portavoz nacional da formación, acompañada das nacionalistas Noa Presas e Mercedes Queixas, foi a encargada de presentar unha campaña que, partindo dalgúns versos da canción eurovisiva, "pretende denunciar que segue existindo unha cosificación e sexualización dos corpos das mulleres".

Másnoticias

Tres candidaturas diferentes concurrirán a la Asamblea del BNG

21/11/2024

O BNG reclama 144 millóns máis para Vigo nos Orzamentos da Xunta de 2025

21/11/2024

Pontón destacou que é "especialmente grave" que un medio público "sómese a normalizar esa concepción e esa imaxe" a través dunha letra que a campaña do BNG "convida a reescribir".

"Mellor dicir que as mulleres facemos sentir o 'bun bun' dos nosos tambores, que estamos 'ready' (listas) para cambiar a realidade das cousas e que somos as que máis problemas monetarios padecemos, nunha brecha salarial que, lonxe de diminuír, incrementouse durante a pandemia", explicou. Buscan así mostrar "a discriminación que aínda existe, cada día, vestida de normalidade, coma se nada pasase". "É necesario denunciar como o machismo e o patriarcado oficializan o seu discurso, consolidando a discriminación das mulleres en todos os ámbitos, nos materiais e tamén nos simbólicos", insisten.

Para iso, o BNG instou a "desenmascarar" o machismo "utilizando as ferramentas do feminismo". "Porque as mulleres non somos cousas, non somos obxectos, nin queremos seguir sendo discriminadas con máis pobreza, máis paro, salarios máis baixos ou máis violencias", defenderon.

"Fronte a todas estas formas de discriminación", piden utilizar "a forza do feminismo e das mulleres" para seguir avanzando, porque "aínda queda moito por facer e por conseguir" para superar "os teitos de cristal e os chans pegañentos".

Saír á rúa o 8M

Doutra banda, Ana Pontón tamén quixo pór o foco na violencia de xénero, "esa que se exerce contra as mulleres polo mero feito de selo como forma extrema de discriminación, que hai que combater sempre e en todo lugar".

Para o 8 de marzo, as nacionalistas convidaron a "repetir" unha gran mobilización na rúa para "reclamar unha terra de mulleres que poidan ser libres e iguais, con dereitos, con dignidade e con futuro"; "estar xuntas este 8M para impulsar o resto do ano as medidas que necesitamos para avanzar cara a unha sociedade de iguais".

"A defensa dos dereitos das mulleres forma parte dos nosos cimentos como organización política e non imos permitir nin un paso atrás no que custou tanto esforzo conseguir. Seguiremos traballando en todos os ámbitos pola igualdade real das mulleres", aseguraron.