O polígono xestionado polos comuneiros de Tameiga logra acadar o 100% de ocupación

A Comunidade de Montes de Tameiga vén de anunciar a formalización de dous contratos de aluguer con dúas importantes empresas da comarca de Vigo que se instalarán no polígono de Monte Faquiña, xestionado polos comuneiros.

Segundo explican os vecinos, as dúas empresas que se instalarán no polígono realizarán “fortes investimentos”. Un dos contratos asinouse con Galitruck e o grupo Martínez Rosa -dedicadas á loxística- e outro con Baygar. As dúas primeiras instalarase nunha parcela de 6.612 metros cadrados cunha nave industrial de 1.747. En total, 36 traballadores ocuparán a zona de oficinas do edificio. “No polígono de Monte Faquiña imos centralizar a nosa  actividade que se atopaba dispersa entre Vigo e O Porriño. Escollimos este poligono polas súas boas condicións e a súa situación estratéxica”, afirma Fernando Sanmartín, administrador de ambas.

Másnoticias

El PP exige dimisiones tras la manipulación de una foto eliminando a su portavoz en Salceda

01/11/2025

Éxito de público en el arranque de D'Gusta Porriño, la ruta de tapeo más emblemática del área

01/11/2025

A outra empresa que se traslada a Monte Faquiña é Baygar. Dedícase á venda e alugueiro de maquinaria para a construción e concentrará gran parte da súa actividade nunha das parcelas centrais do polígono na que edificará unha nave industrial de 2.000 metros cadrados para desenvolver a súa actividade.

A elección destas compañías fíxose seguindo criterios que “non impliquen unha perda de calidade de vida da veciñanza”, explica o presidente da Comunidade de Montes, César Lago, para sinalar que “ademais de crear postos de traballo, pagarán impostos en Mos e aliviarán as maltreitas contas do noso Concello”.  Lago lembra que o pago dos alugueiros repercute directamente na veciñanza xa que “se inviste en obra social e cultural da parroquia”.

A Comunidade de Montes de Tameiga continúa recollendo as propostas do “Comité Consultivo de Monte Faquiña” e traballando para levalas a cabo. O comité consultivo está formado por representantes das empresas aloxadas no polígono, da veciñanza de Tameiga e das administracións local e provincial e ten como obxectivo recoller as propostas para mellorar o polígono e adecualo ás necesidades das empresas usuarias “sen prexuízo da calidade de vida da veciñanza colindante”. A xunta reitora da comunidade subliña que con estas dúas novas incorporacións o parque empresarial de Monte Faquiña acada a súa total ocupación.