Moaña pechará unha intensa semana festiva coas súas primeiras pre-badaladas

O Concello de Moaña sumarase este ano á iniciativa de celebrar por adiantado a chegada do novo ano e facelo, ademais, cunha temática pensada para os máis cativos. A primeira edición das Pre-badaladas de Moaña celebrarase o luns, 31 de decembro, entre as 11:00 e as 13:00 horas na Praza do Concello.

A cita, coa que “a rapazada pode desfrutar do ambiente festivo do fin de ano a horas prudentes”, segundo explican dende o Concello, contará con diferentes actividades de animación e musicais. Porén, o gran momento chegará cando se dean as 12:00 do mediodía. Será entón cando as uvas se substitúan polos doce cheetos da sorte, que serán repartidos polo Concello en colaboración coa asociación da Illa dos Ratos.

Másnoticias

Detectado un nuevo foco de gripe aviar en aves silvestres en Moaña

17/10/2025

Anuncian alegaciones ante la "desproporcionada subida" de la tasa de basura en O Morrazo

17/10/2025

Estas particulares pre-badaladas pecharán o ano, pero ao longo desta semana haberá unha ampla oferta de actividades pensadas para os máis pequenos. Este mesmo sábado, 22 de decembro, os Rechouchíos chegarán á Praza do Concello co espectáculo infantil de Os Tres TENeDores e o seu “Cocido exprés” (18:00 horas). Este programa de actividades de lecer en galego repetirá o venres, 28 de decembro con Charo Pita “No País do Vento” (18:00 horas – Praza do Concello).

Este domingo, 23 de decembro, o alto da Praza de Abastos converterase nun espazo de ocio para os rapaces e rapazas con obradoiros de Nadal e diferentes xogos (17:00 a 18:30 horas).

Por último, o 24 de decembro, chegarán O Apalpador e Papá Noel. O primeiro fará parada en Moaña na súa viaxe dende O Courel. Este xigante que viste roupa remendada, unha característica boina, fuma pipa e ten unha rechamante barba rubia, baixa da montaña no Nadal para visitar aos nenos e nenas galegas namentres dormen. No municipio do Morrazo estará ás 12:00 horas no parque infantil da Praza de Abastos.

Dende Laponia Papá Noel fará a súa recepción entre as 16:30 e 19:00 horas no alto da Praza de Abastos con actividades, xogos e até un photocall.