A Guarda retoma o ciclo de Cinema de Muller con medidas excepcionais contra o COVID19

O Concello da Guarda, a través da Concellería de Igualdade e o Centro de Información á Muller, retoma este mes de xuño o ciclo de Cinema de Muller, suspendido tras o inicio da crise provocada pola pandemia do COVID19. Esta actividade está enmarcada nas conmemoracións do Día Internacional da Muller 2020.

O Centro Cultural da Guarda será o escenario para as dúas proxeccións do programa de Cinema da Muller, os días 12 de xuño e 19 de xuño, todas as proxeccións contarán cunha charla coloquio previa ás 20:00 horas e posterior proxección ás 21:00 horas. O venres día 12 de xuño de 2020 proxectarase “As Lindas” de Melisa Liebenthal.

Másnoticias

Galicia cataloga 196 "tesoros" en la costa del área de Vigo para facilitar su recuperación con nuevos usos

28/10/2025

La muralla medieval que resurge con el proyecto de reforma de una plaza en Tui

26/10/2025

As Lindas é un documental dirixido pola novísima Melisa Liebenthal (Bos Aires, 1991) que a pesar de ser a súa ópera prima, foi xa premiada na sección Bright Future do Festival Internacional de Cinema de Rotterdam, e na terceira edición Asterisco do Festival Internacional LGBTIQ, así como no BAFICI 2016, onde obtivo o premio á mellor directora na competencia arxentina.

Que é belo e que non o é? Melisa aborda os estereotipos de xénero baseándose nun arquivo documental de fotografías vellas onde aparecen ela e as súas amigas, feito que a leva a ter unha excusa para reunirse con elas, gravalas e entrevistalas para coñecer cales foron as súas vivencias a partir da adolescencia e como as sentiron. Nestes encontros máis que sinceros, Melisa descobre que os medos e angustias que a chegaron en certo punto a obsesionar, foron medos compartidos polo resto das protagonistas nesta viaxe ao pasado e que agora levan a cabo xuntas dende unha perspectiva máis madura.

Para rematar este ciclo, o venres 19 de xuño proxectarase “Histeria”, de Tanya Wexler. Dr. Mortimer Granville (Hugh Dancy) é un médico mozo que constantemente ten problemas cos seus compañeiros polos seus puntos de vista modernos sobre a medicina. Granville é contratado como asistente polo Dr. Dalrymple (Jonathan Pryce), o cal está especializado no tratamento da histeria, un mal diagnosticado comunmente ás mulleres da época, e que tiña por tratamento masaxes na área xenital para causar “convulsións paroxísticas” que na verdade eran orgasmos.

O ciclo de cinema contará con medidas extraordinarias de saúde e hixiene para frear a COVID19. Estas medidas obrigan a ter un aforo máximo de 50 persoas, que estarán en butacas separadas e numeradas, a diferenciación de accesos e saídas,. O Concello da Guarda aconsella reserva previa a través do 986 61 00 00 ext. 5 en horario de 09:00 a 14:30 o en cultura@aguarda.es. Ademais, haberá desinfección previa da sala, butacas e disposición de xel hidroalcohólico para usuarias e usuarios.