Cinco motivos para non perderse a feira ECOartesá de Moaña deste domingo

Como de costume en outubro, Moaña acolle a súa feira ECOartesá coa que promocionar os produtos ecolóxicos e naturais da nosa terra, pero tamén como boa escusa para saír a desfrutar dunha xornada de domingo e desfrutar da gastronomía galega.

Organizada polo Concello en colaboración con Ekohuerta, esta nova edición da feira de artesáns, produtos ecolóxicos e agricultura sustentable celebrarase o domingo, 21 de outubro de 11:00 a 20:00 horas na contorna do palco da música, ao carón da praza de abastos.

Másnoticias

El conmovedor mensaje del concejal de Cangas José Luis Gestido a su hijo, recientemente fallecido

22/11/2025

Familiares del Pitanxo, conmocionados por la muerte de Miguel, el joven fallecido en el accidente en Moaña

22/11/2025

Desta vez, ao redor de 130 postos acudirán á chamada do municipio do Morrazo para mostrar os seus mellores produtos.

A arte de crear a man, en directo

En cada edición, a feira tenta sorprender aos asistentes coa demostración dun oficio tradicional. Un mestre artesán instálase en Moaña e traballa en directo os seus produtos, amosándonos non so o seu bo facer, senón tamén o traballo que moitos dos devanceiros facían no seu día a día. Desta vez será un zoqueiro o que se encargue de sorprender aos asistentes cun oficio arestora case desaparecido pero vital noutro momento da nosa historia. Ademais, haberá tamén produtos artesáns de cestería ou cerámica.

Produtos do mar e da terra

Ao carón dos artesáns, na parte central da feira, estarán os postos de alimentación e produtos gastronómicos elaborados. Así, os asistentes poderán degustar polbo, mexillóns ou calamares na sección dedicada ao mar, pero tamén haberá pizza e sidra artesá, viños da terra e comida vegana. Non faltarán tampouco os produtos da horta e os queixos ecolóxicos.

Un agasallo diferente para o Nadal

Aínda que quedan algo máis de dous meses para as festas de Nadal, os máis previsores xa comezan a facer as súas compras para agasallar á familia e amigos. A feira ECOartesá deste domingo é unha oportunidade ideal para facerse con produtos sorprendentes que van dende a cosmética natural até chamativas antigüidades.

O paraíso dos cativos

Dende a concellería de Turismo e Promoción Económica destácase que outro dos obxectivos da feira e poder ser punto de encontro de familias, permitindo a conciliación laboral e ofrecendo actividades tamén para a rapazada. Así, este desta vez os cativos poderán participar nun obradoiro de monicreques de papel con Viravolta Títeres ás 17:00 horas. Algo máis tarde, ás 18:30 horas, será o momento para que queimen toda a enerxía co concerto de Uxía Lambona e a Banda Molona.

Unha boa escusa de paseo

Ademais de todos os puntos anteriores, outro dos motivo para achegarse a Moaña non é outro que poder desfrutar dun dos últimos domingos de sol e boa temperatura paseando na beira do mar nun ambiente festivo.