Os robots volverán competir na Escola de Enxeñería Industrial da UVigo en abril

A competición de robots da Escola de Enxeñería Industrial foi un máis dos millóns de eventos que a pandemia impediu celebrar durante os tres últimos anos. Recuperada a normalidade, a competición, que acada este ano a súa sexta edición, volverá encher o 21 de abril a EEI de robots deseñados polo alumnado de ESO, Bacharelato, universidades e FP. 4000 estudantes de toda Galicia participaron nas cinco primeiras edicións do concurso, que este ano estreará as modalidades BE-ROBOT e DeMO-ROBOT, que substitúen as tradicionais WALL-e e R2D2, ademais de contar cun kit moi mellorado, o mBot 2, respecto aos de anteriores edicións, que achega máis posibilidades ás e aos participantes, que tamén disporán dalgunhas actividades para desenvolver nos centros de ensino. “Á marxe do kit, ao meu entender, o máis destacable é que o concurso contará con novas probas, que esperamos esperten o interese dos participantes. A verdade é que se estivo a traballar nas probas para intentar que estas respondan á situación actual, onde temos constancia de que os rapaces e rapazas están mellor preparados que en edicións anteriores e así poidan poñer a proba as súas destrezas”, explica o director da EEI, Juan Pardo Froján.

Segue a liña ‘marchoso’ e Velódromo ‘mareante’ son as dúas probas que terá que enfrontar o alumnado de ESO e Bacharelato que competirá, en equipos de entre catro e seis compoñentes, na categoría BE Robot, na que terán que, no primeiro caso, dar unha volta completa a un circuíto marcado no chan o máis rápido posible, evitando todos os obstáculos e, no segundo, completar o número de voltas no menor tempo posible a un recinto circular, no que tamén deberán sortear obstáculos formados por cilindros, situados nos extremos dos diámetros perpendiculares. Pola súa banda o alumnado universitario e de FP, que participará na categoría DeMO-ROBOT en equipos cun máximo de seis integrantes, deberá facer fronte a catro probas: rastrexo, labirinto e triplo ensaio con illa, todas elas individuais, e a unha proba colectiva denominada sumo na que un único robot aspira a quedarse no ring.

Másnoticias

Investigadores do CIM estudan o papel do plancto mariño no almacenamento de CO₂ nos océanos

01/08/2025

El Gobierno anuncia una ayuda de 7,5 millones para la UVigo para fortalecer su área de fotónica

31/07/2025

Os equipos que desexen participar na competición de robots teñen de prazo ata o 30 de xaneiro para inscribirse (premer aqui), para o que deberán cubrir un formulario que atoparán na web da Escola. As prazas están limitadas a 156 equipos na categoría Be Robot, cun límite de 10 equipos por centros. “Sinceramente, despois de tres anos de parón na actividade é moi difícil saber cal vai ser a resposta por parte dos centros. No que puidemos pulsar, pensamos que será ben acollida e se nos baseamos na última edición, a participación debería ser alta”, sinala o director da EEI.

Compromiso de recuperar un concurso convertido nun referente

Nacido hai oito anos, co obxectivo de achegar a Universidade ao alumnado de ensino secundario e Bacharelato, ademais de promocionar as titulacións da Escola e fomentar o interese do alumnado polas disciplinas STEM, e máis concretamente polos estudos de enxeñaría, a recuperación da competición de robots, logo do parón obrigado pola pandemia, era un compromiso para a dirección da EEI. “Tras a celebración das cinco anteriores edicións e a boa acollida e resposta que obtivemos nos centros educativos, o concurso converteuse nun referente, nun clásico, que espertaba unha grande expectación. Recuperalo é un compromiso que tiñamos que atender ante as achegas de ánimo e as consultas que tivemos estes últimos anos”, confirma Pardo Froján, que tamén advirte da responsabilidade que implica desenvolver unha xornada que esperte nos rapaces e rapazas un interese por unha actividade que complemente a formación dos seus centros, nun mundo no que cada vez a robótica xoga un papel máis destacado.

“É certo que desenvolver un concurso desta características supón un gran traballo, un grande esforzo, pero a nosa motivación, o noso compromiso, é tentar fomentar desde as bases o interese polas actividades STEM”, recoñece o director do centro, que tamén sinala que, “vendo o vivido polos rapaces e rapazas nas edicións anteriores, calquera esforzo merece a pena”, explica Pardo Froján.