Un total de 114 embarcacións chegan a Moaña para participar no Encontro de Embarcacións Tradicionais

O prazo para que asociacións e particulares inscribisen embarcacións para participar no XV Encontro de Embarcacións Tradicionais de Galicia xa está pechado. Un total de 114 embarcacións de diferentes tipoloxías estarán en Moaña entre os días 5 e 8 de agosto. Trátanse de barcos chegados de todas partes de España e incluso de Portugal. Por primeira vez, ademais, este ano participará unha embarcación das Illas Canarias, concretamente o bote escola ‘Las Palmas de Gran Canaria’.

Ao Encontro de Embarcacións Tradicionais De Galicia foron convidadas todas as asociacións pertencentes á Federación Galega pola Cultura Marítima e Fluvial (Culturmar) e entidades afíns, tanto de Galicia como doutros países e comunidades, tamén particulares e institucións de interese cultural e patrimonial. Este ano, visitarán Moaña numerosos barcos chegados do País Vasco (Zumaia, Portugalete, Lekeitio e Ondarroa), e de Portugal (Esposende). Ademais, navegarán pola ría embarcacións de infinidade de vilas de Galicia e de todas as rías galegas. Entre o cento de participantes podemos atopar barcos de Vigo, O Grove, Combarro, Ribeira, Sada, Portonovo, Cangas, Cambados, Aguete, Carril, A Pobra do Caramiñal, Cabo de Cruz, O Freixo, Muros, A Illa de Arousa, A Guarda, Meloxo, Ares, Ferrol ou Lira. Unha amplísima representación de embarcacións tradicionais que pode dar unha idea da gran riqueza marítimo fluvial de Galicia.

Másnoticias

Lanzan nuevas rutas por la historia, fauna y flora de O Morrazo y serán totalmente gratis

18/04/2025

Moaña pone fecha a la segunda edición de la fiesta gastronómica que pone en valor el bandullo

17/04/2025

Nesta 15 edición, poderanse ver no mar de Moaña embarcacións pertencentes a unhas 25 tipoloxías tradicionais diferentes: botes, gamelas, dornas, bucetas, racús, dornas de tope, traiñeiras, carochos, dornas nai, galeóns, gamelas guardesas, balandros, tarrafas, lanchas xeiteiras, botes de Ribadeo, bateis, choupáns, botes de media construción, botes polbeiros, volanteiros, muletas (catalanas), catraias ou doris bacaloeiras de Euskadi. Será un espectáculo único que terá a ría de Vigo como escenario e que contará coa colaboración activa do voluntariado e das asociacións da vila de Moaña.

A aposta pola cultura será outro dos elementos fundamentais durante a celebración do Encontro de Embarcacións Tradicionais en Moaña. A vila morracense preparou unha previa moi especial desta gran desta do mar o mércores 4 de agosto cunha “Noite de fados” que terá lugar no Eirado do Ferreiro ás 21:30 horas.

Outra das citas imprescindibles do Encontro de Moaña serán as denominadas como as “Noites de música”, concertos que terán lugar no Espazo Sons de Mar ás 22:30 horas e que contará como banda sonora en directo coa música de Xurxo Souto & Pulpiño Viascón: O canto das conserveiras (xoves 5), ISGA Collective (venres 6), Guadi Galego (sábado 7) e The Lelli Kelly’s (domingo 8). A concelleira de Turismo e Promoción Económica, Coral Ríos, destacou que toda a programación desta gran festa do mar na Ría contará con seguridade sanitaria antiCovid. “Temos que seguir facendo cultura a pesar da pandemia. O sinxelo sería cancelar, pero non o imos facer. Somos teimudas”, afirmaba a concelleira moañesa.

A proposta de ocio do Encontro de Embarcacións Tradicionais de Galicia inclúe algunha das rutas guiadas de “Descubre Moaña” como é o caso de “A Moaña mariñeira”, “As canteiras do litoral de Moaña” ou a do “O último barco”.