A mensaxe que esconden os carteis de "Vigo, o novo Lepe?"

“Vigo, o novo Lepe?” Esta é a pregunta que nos últimos días vemos espallada en carteis que cobren diferentes partes da cidade. No pé dese enigmático interrogante, un nome: CAÍN. Son as siglas do Colectivo de Admiradores da Iluminación do Nadal. Unha mensaxe irónica. Pura retranca.

"Xorde da man de persoas vencelladas ao mundo da cultura que decidimos poñer en común o desfeito absoluto e intencionado da administración municipal sobre todo o que xira en torno á cultura". Así o explica un dos membros de CAÍN, unha entidade que prefire actuar de forma colectiva evitando individualidades. Queren que a súa denuncia sexa a súa mensaxe, ao máis puro estilo Banksy.

Másnoticias

Trueno prende la chispa en Castrelos con un conciertazo a ritmo de rap, hip-hop y "tranky funky"

18/07/2025

Caballero lamenta el "maltrato a la educación pública" de Vigo tras dimitir la directiva del IES Valadares

18/07/2025

Precisamente, para este novo movemento "o alumeado de Nadal é o buque insignia de todo un despropósito", argumentan dende CAÍN ao entender que "cos cartos do alumeado pódense facer moitas outras cousas non só a nivel cultural, senón tamén a nivel social". Esta acción non é un ataque frontal a festa do Nadal. O obxectivo, aseguran, é resaltar que "os poderes públicos teñen que ser moi responsables e non ofrecer unicamente circo".

Con esta idea, CAÍN, xunto a outros catro colectivos citou o pasado venres á cidadanía nun acto público de debate no IES Politécnico. Co evento, buscábase artellar unha acción colectiva coa que propoñer outra forma de xestionar a cultura. A cita foi "un éxito histórico", destacan. "Dende os oitenta non houbo unha reunión de tanto calado a nivel de protesta social en torno á cultura". Porén, o encontro non buscaba só a denuncia, senón que tamén se quería propoñer e demostrar que "non son soamente catro iluminados elitistas que protestan".

Agora o movemento avanza para "espallarse traballando con outros colectivos e levar adiante diferentes proxectos que axudarán a difundir a realidade social e cultural da cidade, así como propoñer fórmulas máis participativas e xustas".

É Vigo o novo Lepe? CAÍN pon sobre a mesa un debate co que busca "non deixar indiferente a ninguén e remover conciencias para que a xente reflexione sobre que cidade quere".