A Real Academia de Ingeniería concede a Belén Riveiro o galardón aos mellores investigadores novos

Hai apenas unhas semanas a profesora e investigadora da Universidade de Vigo Belén Riveiro recibiu en Santiago de Compostela un dos galardóns da primeira edición dos Premios Real Academia Galega de Ciencias-Universidad Intercontinental de la Empresa para investigadoras e investigadores novos e esta semana viaxou a Madrid para recoller na sede da Real Academia de Ingeniería o premio que anualmente concede esta institución aos mellores investigadores mozos. Recibiu o galardón nunha cerimonia celebrada no serán deste martes na sede da academia de mans do seu presidente, Jaime Domínguez Abascal.

“Para min é unha honra recibir un premio tan prestixioso a nivel nacional e outorgado por científicos tan recoñecidos como son os académicos da Real Academia de Ingeniería”, explica a docente, ao que engade que sinte que este galardón “vén a compensar os esforzos e sacrificios realizados ao longo dos últimos anos, non só por min, senón tamén polos meus compañeiros do grupo de Xeotecnoloxías Aplicadas; por iso, este premio é compartido con eles”.

Másnoticias

El pasado romano de un paraíso de las Rías Baixas sale a la luz: casas, ánforas y asentamiento milenario

19/06/2026

La UVigo sigue creciendo, se sitúa ya entre las 850 mejores universidades del mundo

18/06/2026

Na mesma liña, agradeceu tamén á RAI a entrega duns galardóns “que significan un recoñecemento e impulso a que enxeñeiros do noso país poidan contribuír á ciencia excelente”, “científicas e científicos que amamos esta profesión”, recalcou a investigadora, quen tivo tamén verbas de agradecemento para os directores do seu grupo de investigación, Pedro Arias e Henrique Lorenzo, “aos meus compañeiros de laboratorio, aos doutorandos que ao longo dos anos contribuíron a xerar coñecemento no noso grupo, así como ás distintas entidades que me acolleron ao longo da miña formación de posdoutoramento e todos os meus colabodores e colaboradoras”. A maiores, emocionada, tamén á súa familia, os seus pais, marido, fillos e sogros, "que son quen, verdadeiramente, fan posible que a conciliación familia ciencia sexa posible".

Contribucións científicas con elevado impacto en transferencia

Profesora do Departamento de Enxeñaría dos materiais, mecánica aplicada e construción e investigadora do grupo de Xeotecnoloxías Aplicadas do Cintecx, Centro de Investigación en Tecnoloxías, Enerxía e Procesos Industriais da Universidade de Vigo, Riveiro recibiu o Premio Agustín de Betancourt y Molina pola súa contribución no campo da monitorización da saúde de estruturas de enxeñaría civil que teñen dado lugar a relevantes contribucións científicas e tamén a unha importante transferencia tecnolóxica a través de contratos de envergadura con empresas, e sete patentes, tres delas licenciadas.

“Os principais fitos da miña carreira científica están relacionados coa resiliencia de infraestruturas, en particular coas infraestruturas de transporte terrestre”, explicou no seu discurso a investigadora, remarcando o carácter “esencial” destas investigacións para contribuír a conseguir alcanzar o desenvolvemento sostible. “Estase demostrando que os efectos do cambio climático están acelerando eses procesos de degradación das infraestruturas. Os eventos extremos son cada vez máis frecuentes, como puidemos comprobar recentemente no noso país, o que aumenta considerablemente os riscos de carácter natural”, remarcou Riveiro.

A comisión dos premios da Real Academia de Ingeniería valorou así mesmo o feito de que este importante labor levado a cabo por Riveiro foi xa recoñecido con importantes distincións, entre elas, o Premio Nacional de Investigación a Jóvenes Matilde Ucelay, na súa edición de 2022, concedido polo Ministerio de Ciencia e Innovación, ou a Medalla Juan López de Peñalver concedida pola RAI en 2017 “polas súas contribucións á aplicación de técnicas xeománticas á monitorización dimensional estrutural de estruturas de enxeñaría civil e construción, así como aplicación de modelado 3D en cidades intelixentes”.

Por unanimidade da comisión

A decisión de outorgarlle este galardón foi adoptada por unanimidade de todos os académicos que participaron na reunión da Comisión de Premios da RAI, celebrada o pasado mes de outubro. No mesmo acto, tamén se entregou o premio Juan López de Peñalver, no que se recoñece igualmente aos mellores investigadores novos, ‘ex aequo’ a Rubén Tolosa, da Escola Politécnica Superior da Universidad Autónoma de Madrid, e a Natalia Díaz, da Escola Técnica Superior de Enxeñaría Informática e de Telecomunicacións da Universidad de Granada. Igualmente, foron galardoados con medallas de accésit ao premio Agustín de Betancourt polo seu labor investigador os enxeñeiros Sergi Abadal Caballé, Raquel Lebrero Fernández e Mª Mirian Velay Lizancos.