A Universidade de Vigo converte Lalín na capital galega da ciencia

Este venres 30 de maio, Lalín converteuse na capital galega da ciencia coa cuarta edición de ‘A ciencia que vén ten nome de muller’, unha expo-feira científica organizada pola Universidade de Vigo, que se celebra por primeira vez fóra das cidades que acollen os seus campus. O evento desenvólvese ao longo de toda a xornada no edificio sociocultural da rúa Manuel Rivero e comprende unha ampla e diversa programación de actividades científicas de carácter lúdico para todas as idades e intereses. Preto de 30 obradoiros, stands interactivos, coloquios, espectáculos e actividades artísticas, coordinados por preto de 25 grupos de investigación, conforman a programación dun evento que arrancou na mañá deste venres coa visita de preto de 240 estudantes de sete centros de ensino do municipio e que pola tarde abre as súas portas ao conxunto da cidadanía.

Con actividades tanto nos espazos exteriores como interiores deste edificio sociocultural, ‘A ciencia que vén ten nome de muller’ ten como obxectivo achegar a ciencia á cidadanía, promover vocacións STEM entre a mocidade, especialmente entre as nenas, e visibilizar o papel das mulleres investigadoras da Universidade de Vigo. Organizada pola Unidade de Cultura Científica e da Innovación da UVigo, a feira insírese dentro das actividades do programa ‘Ciencia de Ida e Volta’ e conta co financiamento da Fundación Española para la Ciencia y la Tecnología (FECYT) – Ministerio de Ciencia, Innovación e Universidades e da Deputación de Pontevedra, así como coa colaboración do Concello de Lalín.

Másnoticias

A UVigo comeza a escavación dunha antiga necrópole situada no propio campus universitario

04/09/2025

La ciencia llega al centro de Vigo con actividades gratuitas para todos los públicos

03/09/2025

Vocacións científicas e referentes femininos

Procedentes dos CEIP Varela Buxán, Xesús Golmar, Manuel Rivero, Xoaquín Loriga de Prado e Vicente Arias de la Maza, do colexio Sagrado Corazón-Scientia e IES Ramón María Aller Ulloa, preto de 240 estudantes de primaria e secundaria participaron esta mañá en visitas guiadas pola feira. Dirixido a que puidesen descubrir a ciencia desde unha perspectiva divertida e próxima, este evento permitiulles gozar con propostas como o ‘xogo do salmón’ ou outro centrado na fisioloxía dos peixes, da man de investigadoras e investigadoras do CIM, así como de experimentos sobre alimentación sostible ou sobre reaccións químicas e de actividades coas que exploraron os segredos da criptografía ou os usos das cámaras termográficas.

Este abano de obradoiros e actividades permitiu tamén aos e ás visitantes tocar réplicas de microfósiles, afondar nas aplicacións das xeotecnoloxías ou nas alternativas para a eliminación de contaminantes nas augas, da man de diferentes grupos do Cintecx, así como ver de preto o monopraza de UVigo Motosport, construído polo propio alumnado, ou os prototipos de material espacial achegados por investigadores de atlanTTic.

Por outra banda, o alumnado de secundaria participou tamén en dous obradoiros: un centrado na desinformación, no que aprenderon a detectar noticias falsas e contrastar fontes; e outro sobre ferramentas para exercer unha cidadanía crítica, ética e comprometida co desenvolvemento inclusivo. Ademais, todo o estudantado tivo a oportunidade de asistir ao espectáculo de danza contemporánea A conectividade que nos move, que afonda na interdependencia ecolóxica a través do movemento e a expresión artística.

Ciencia para un público familiar

Xa pola tarde, a feira abriu as súas portas ao público xeral, o que permitiu que á mocidade e ás súas familias puidesen participar nas iniciativas dos diferentes stands, así como gozar doutra serie de actividades, coma unha exposición itinerante contra a desinformación, un mural colaborativo sobre sostibilidade nos centros educativos ou un punto de troco de obxectos. Obradoiros sobre as aplicacións das matemáticas, a creación de libros de artista ou antigas técnicas de escritura formaban parte tamén dunha programación que se ve complementada, á súa vez, por unha serie de faladoiros e presentacións.

O broche final da feira porao o espectáculo teatral Elemental, protagonizado por Manuel Vicente, César Goldi e Juanjo Fernández, que mestura ciencia, humor e música. Xusto antes, a charla de clausura Fala que sente: percibindo emocións a través da melodía das linguas achegará o público, con interpretación en lingua de signos, ao estudo interdisciplinar das emocións e da linguaxe, da man da investigadora do Laboratorio de Linguaxe e Cognición Rosalía Rodríguez.

Previamente, o auditorio do edificio sociocultural acollerá, ás 19:00 horas, o acto de clausura desta feira, no que interveñen as vicerreitoras da Universidade de Vigo Belén Rubio, de Investigación e Transferencia, e Mónica Valderrama, de Comunicación e Relacións Institucionais; a deputada provincial de Igualdade, Sandra Bastos, e a concelleira de Igualdade, Carmen Canda.