A UVigo lidera un consorcio europeo para innovar no sector da biofabricación na saúde

Cun orzamento de preto de 2,2 millóns de euros e co obxectivo de dar resposta aos desafíos sociosanitarios asociados ao envellecemento da poboación na eurorrexión Galicia-norte de Portugal e na Unión Europea en xeral, este mércores presentouse en sociedade o Instituto de Biofabricación en Rede para o Envellecemento Saudable (Iberos+). Este proxecto é un dos tres liderados pola Universidade de Vigo que foron seleccionados na convocatoria do programa POCTEP, iniciativa de cooperación transfronteiriza dentro do Interreg VI España-Portugal.

O Hospital Álvaro Cunqueiro de Vigo acolleu hoxe a xuntanza de lanzamento deste proxecto do que forman parte máis de 150 investigadoras e investigadores dos eidos da biofabricación, a enxeñería de tecidos e a medicina personalizada. En total, o consorcio está integrado por 14 entidades público-privadas da eurorrexión (cinco universidades, cinco centros de investigación e catro empresas) unidas co obxectivo de innovar no sector da biofabricación con aplicacións en saúde.

Másnoticias

Arranca una de las Festas da Aguardente más históricas de Galicia con degustación popular

22/08/2025

Arranca en Galicia la construcción de los dos mayores platós de cine de España

22/08/2025

A coordinación do proxecto correspóndelle á UVigo e o investigador principal é Pío González, catedrático do Departamento de Física Aplicada, que explica que este novo proxecto representa a evolución natural de Iberos (Instituto de Bioenxeñería en Rede para o Envellecemento Saudable), que sentou as bases desta colaboración científica entre 2017 e 2020. O novo proxecto nace co obxectivo de que os seus socios traballen en rede para consolidar as competencias de I+D+i de excelencia no sector da biofabricación, orientada á enxeñería de órganos e tecidos e á medicina personalizada. O seu fin último é “mellorar a saúde e a calidade de vida da poboación, con especial atención ás enfermidades asociadas ao envellecemento”.

Sinerxías entres o eido investigador e o tecido empresarial

O consorcio de Iberos+ está formado pola Universidade de Vigo, a través do grupo de Novos Materiais do Cintecx e do grupo de Inmunoloxía e Inmunoterapia do Cinbio, xunto coas universidades de Santiago de Compostela e Católica Portuguesa e Minho, coa Fundación Biomédica Galicia Sur, o Instituto de Investigacións Mariñas do CSIC, o Servizo Galego de Saúde, o Instituto de Investigación e Innovación en Saúde da Universidade do Porto, o Instituto Superior de Enxeñaría do Porto e o Laboratório Ibérico Internacional de Nanotecnoloxía. Unha das principais novidades de Iberos+ respecto do proxecto previo é a incorporación de empresas ao consorcio. Así, dende Galicia únense a BFlow –que desenvolve dispositivos microfluídicos capaces de imitar o comportamento dun órgano no laboratorio–, Arbinova –que, baixo a marca Beta Implants, deseña e fabrica implantes para cirurxía veterinaria– e iBoneLab –especializado en ensaios preclínicos de biomateriais nos tecidos vivos. A empresa portuguesa que se suma ao consorcio é Intelligent Lab on Fiber, que ofrece unha plataforma intelixente para o desenvolvemento de fármacos personalizados.

Todas estas empresas e centros de investigación destacan nos campos que conforman a base científico-tecnolóxica dun campo emerxente e de enorme potencial como é o da biofabricación. En concreto, son referentes en eidos como biomateriais, biosensores, bioimpresión 3D, microfluídica para organ-on-a-chip, técnicas in vitro para o desenvolvemento de tecidos e organoides e plataformas de intelixencia artificial e big data para a diagnose personalizada. As sinerxías que xurdan da posta en común dos coñecementos de todos estes socios, explican dende o consorcio, “contribuirán á creación dun polo europeo á vangarda do coñecemento en saúde e á xeración de novos nichos de mercado grazas a solucións tecnolóxicas innovadoras.

Solucións tecnolóxicas para a saúde do futuro

A estratexia de Iberos+ céntrase en dar resposta aos desafíos sociosanitarios asociados ao envellecemento da poboación na eurorrexión e na UE, pero tamén pon o foco noutros retos importantes como a escaseza de doazóns de órganos e tecidos, o desenvolvemento de fármacos a baixo custo e en tempos reducidos, o compromiso ético de reducir a proba con animais e a necesidade de avanzar no modelo de medicina, utilizando tecidos e organoides biofabricados a partir das propias células do paciente.

Estes obxectivos do consorcio tradúcense, como explicaron hoxe os responsables de Iberos+, nunha serie de accións que pasan pola contratación de 13 investigadores e tecnólogos con traxectoria excelente, a publicación de máis de 20 artigos científicos, a solicitude de tres patentes, o establecemento de 40 contactos con empresas do sector e o desenvolvemento de tres contratos de I+D con empresas, ademais dun acordo de licenza. A primeira das medidas que se porá en marcha será a publicación dun libro branco sobre biofabricación e enxeñería de tecidos, no que se analizará a situación actual deste sector e proporcionará datos que orienten a futura toma de decisións sobre cuestións lexislativas, administrativas ou económicas.