Cinco pezas para gozar do mellor teatro de forma gratuíta na Miteu da Universidade de Vigo

A Mostra Internacional de Teatro Universitario, Miteu, chega a súa 27 edición coa posta en escena, a partir deste mércores 23 de abril, de cinco obras a cargo doutras tantas compañías galegas e internacionais. No Teatro da Cidade Universitaria do campus de Vigo, a partir das 18.30 horas e con entrada libre, o público asistente poderá gozar coa representación de obras de autores clásicos e contemporáneos a cargo das aulas de teatro dos campus de Pontevedra, Ourense e Vigo, así como da mexicana Carla Novi e da Escola Superior de Arte Dramática de Galicia.

Precisamente a ESADg, será a encargada de subir o pano da Miteu coa representación este mércores de Medea, unha e todas, unha revisión contemporánea e combativa do mito clásico, no que Medea deixa de ser só un personaxe para converterse nun símbolo colectivo. Coa dirección e dramaturxia de Noelia Nuño e a posta en escena dun elenco no que participan Lucía Costas, Lucía Fernández e Juan Diego Comesaña, a peza, a partir de textos de Eurípides, Séneca e Manuel Lourenzo, cuestiona con forza as estruturas de poder que historicamente someteron ás mulleres, ás estranxeiras e a todas as que non encaixan.

Másnoticias

Del mar al microscopio, tecnología puntera en Vigo para entender qué pasa en el océano

14/07/2025

Vigo estudia declarar zonas tensionadas y crea un Observatorio de Vivienda con la Universidad

12/07/2025

Ao día seguinte, xoves 24 de abril, a Aula de teatro do campus de Pontevedra porá en escena Saxo Tenor de Roberto Vidal Bolaño. Coa dirección de Salvador del Río, a obra comeza cun mozo falecido por morte violenta, aínda que realmente a obra arranca dous anos despois, cando alguén, supostamente xornalista, intenta aclarar a verdade.

Violencia, sexualidade e marxinalidade para rematar

Logo dun parón dunha semana, a Miteu regresará o mércores 7 de maio coa representación de Ludovico 2.5, unha dramaturxia de Fernando Dacosta, a cargo da Aula de teatro de Ourense. Dacosta, que tamén dirixe esta produción, inspirada libremente en A laranxa mecánica de Anthony Burguess, ofrece ao público unha sátira social e unha proposta ao redor da violencia. Como mesturar sociopatía con ironía, psicopatía con humor negro, reflexión con diversión ou punk con Beethoven. Ao día seguinte, o 8 de maio, a artista mexicana Carla Novi dirixe e interpreta Luchadoras, unha obra da súa autoría que reflexiona ata onde estamos dispostos a chegar na nosa loita por conseguir o que queremos. Un drama social protagonizado por Mara, unha loitadora mexicana que durante anos non puido avanzar na súa profesión ao non cumprir coas regras sexualizadas da loita feminina.

E a mostra chegará ao seu fin o 15 de maio coa representación de Divinas Palabras. Tragicomedia de aldea de Ramón María del Valle-Inclán a cargo da Aula de teatro do campus de Vigo. Baixo a dirección de Casilda Alfaro e Sonia Rúa, unha ducia de actrices e actores darán vida ao drama protagonizado por seres marxinais e no que a acción xira arredor da familia dos Gailos.