Conta atrás para o inicio da actividade do Servizo de Recursos Humanos de Investigación da UVigo

O pasado mes de xullo de 2024, o Consello de Goberno da UVigo aprobaba, logo da necesaria modificación da Relación de Postos de Traballo (RPT), a creación do Servizo de Recursos Humanos de Investigación. Transcorridos sete meses, investigadores e investigadoras principais de varios grupos participaron este mércores nunha sesión na que, por unha banda, se lles presentou a quen será a xefa do servizo, Anabel G. Penín, e pola outra, debateuse a modificación da Normativa de contratación do persoal investigador e de apoio á investigación da UVigo.

“Este é un servizo que nos dará moitas ledicias porque o esquema e as persoas que o integran melloran moitísimo o que tiñamos antes”, dixo o reitor, Manuel Reigosa, na xuntanza celebrada este mediodía no Edificio Miralles do campus vigués e no que a vicerreitora de Investigación, Transferencia e Innovación, Belén Rubio, incidiu na importancia de contar cunha normativa “a gusto de todos”. Neste sentido, o reitor reiterou a importancia que para o equipo que dirixe ten acadar un convenio colectivo para o persoal investigador, algo que se está a negociar neste intre en Galicia. “A posición da UVigo é que estas persoas, ao igual que todos o traballadores non funcionarios, teñen que estar acollidos a un convenio colectivo que regule as relacións laborais deste persoal”, dixo o reitor.

Másnoticias

La UVigo pone en marcha el horario especial de apertura de sus bibliotecas

09/05/2025

Inventos de Vigo que cambian la vida, de detectar baches a una app para buscar objetos perdidos

08/05/2025

Un servizo transcendente

“Por fin configuramos o servizo que está a piques de publicarse na RPT, unha vez que o Consello Social o aprobe”, confirmou a xerenta da UVigo, Yolanda Lesmes, que lembrou que o novo Servizo de Recursos Humanos de Investigación reunirá responsabilidades que antes estaban partilladas por tres unidades administrativas diferentes. O baleiro detectado na xestión do recursos humanos de investigación, “que son parte importante da UVigo, ata un terzo do persoal”, dixo Lesmes, foi o que impulsou ao actual equipo de goberno a poñer en marcha un servizo que a xerenta cualificou de “transcendente”, ao implicar, non só a contratación, senón tamén a regulación do réxime xurídico , a determinación da carreira profesional, o recoñecemento de dereitos e a xestión da vida profesional.

“Coa creación deste servizo pretendemos que se identifique todo o colectivo, que este poida resolver as súas cuestións, mellorar as canles de comunicación de todas as partes implicadas (investigadores principais e os grupos, dunha banda, e por outra o persoal contratado), camiñar cara unha homoxeneización da selección de persoal e condicións de traballo e ter espazo de interlocución e resolución de dúbidas”, detallou a xerenta, en relación cos obxectivos do novo servizo.

Un reto e un recoñecemento ao traballo realizado

Anabel G. Penín afirmou que a xefatura do novo servizo é para ela “un gran reto”, ao tempo que destacou que se está a reunir nun servizo unidades que antes funcionaban de xeito independente, “o que vai permitir mellorar a estratexia”. Nomeada xefa do Servizo de Recursos Humanos de Investigación logo dun proceso selectivo no que se presentaron varias candidaturas, González Penín ocupaba desde 2017 a Xefatura de Sección de Recursos Humanos de I+D do Servizo de Apoio á Investigación e Desenvolvemento e entre os anos 2010 ao 2018 foi a directora da Unidade de Igualdade da UVigo, ademais de ocupar o posto de secretaria de órganos de goberno e xefatura de negociado no Servizo de Retribucións e Seguros Sociais.

Licenciada en Dereito pola Universidade de Santiago de Compostela e máster en Estudos de Xénero e Xestión de Políticas de Igualdade pola Universitat de Llèida, Anabel G. Penín desenvolverá as súas funcións á fronte do novo servizo xunto a outras nove persoas que conforman esta estrutura, que se completa con dúas xefaturas de sección, outra de área, tres de negociado e tres postos base.

Tanto o reitor, Manuel Reigosa, como a xerenta da UVigo, Yolanda Lesmes gabaron a traxectoria e desempeño nas súas funcións de González Penín á que se referiron como “unha garantía” e “un bo comezo para este novo esquema” e á que agradeceron que asuma este cargo.