Investigadores da UVigo optimizan o rendemento do mellor equipo ciclista amateur de España

Por terceiro ano consecutivo, os corredores do Equipo Cortizo, o mellor club ciclista non profesional de España, teñen como aliados na súa preparación os investigadores e investigadoras do Laboratorio de Rendemento Deportivo, Condición Física e Benestar da Universidade de Vigo. A través dun contrato de I+D, os integrantes do equipo elite e sub23 do club de Padrón sométense ao longo da tempada a unha serie de avaliacións do rendemento na Facultade de Ciencias da Educación e do Deporte. Estas probas están dirixidas a identificar posibles áreas de mellora na súa preparación física e definir pautas de adestramento específicas para os integrantes dun equipo que rematou a pasada tempada no primeiro posto dos ránkings elite e sub23 da Federación Española de Ciclismo.

Trátase dun conxunto de probas dirixidas a avaliar diferentes parámetros do rendemento, como o consumo máximo de osíxeno, os limiares ventilatorios, a potencia do pedaleo, a mobilidade articular, o control postural ou as asimetrías laterais e funcionais. A información obtida permite logo “ir ciclista por ciclista, vendo onde pode mellorar”, e definir recomendacións que permitan orientar a preparación física “a eses aspectos que entendemos que van incidir no rendemento”, explica Óscar García, decano da facultade e responsable deste laboratorio.

Másnoticias

Caballero vuelve a reclamar Medicina en la ciudad y acusa a la Xunta de "oposición total" a Vigo

18/10/2025

La UVigo solicitará Medicina si no hay nuevo convenio de descentralización antes de un mes

18/10/2025

Unha tempada histórica

O obxectivo destas avaliacións é reunir información que contribúa ao traballo do egresado da facultade e preparador físico do Equipo Cortizo José Abalo, coa vista posta no desenvolvemento futuro dun grupo de deportistas “moi novos e cun potencial moi grande”, recoñece García. “O obxectivo segue sendo o mesmo”, sinala o investigador respecto deste terceiro ano de colaboración co club padronés, que completaba en 2024 a mellor tempada dos seus preto de 70 anos de historia. Un total de 51 vitorias individuais, logradas por 15 corredores diferentes, e o triunfo en nove voltas por etapas son algúns dos éxitos acadados o pasado ano polo grupo que dirixe o exciclista profesional e exalumno da facultade Marcos Serrano. Entre estes, atópanse fitos como as vitorias de Dani Cavia e Hugo De la Calle, respectivamente, na Copa de España e no Campionato de España en Ruta sub23.

“Creo que foi algo irrepetible”, sinala García, que recoñece que xa pensaba isto ao remate de 2023, primeira tempada na que o laboratorio colaborou co equipo e na que este lograra 23 vitorias individuais e o primeiro posto no ránking elite da federación española. “Hai que ser conscientes de que haberá anos nos que acertemos menos, sen dúbida”, engade o investigador, que lembra que o traballo do laboratorio está centrado en axudar ao desenvolvemento dos ciclistas e non no seu rendemento a curto prazo. Nese senso, recoñece que un dos factores deste éxito pode ter sido que “xerouse un sistema de adestramento e de traballo acertado, cunha comunicación moi fluída”, así como a capacidade de Serrano para “sacar moito partido na estrada” a este grupo de corredores. Do mesmo xeito, García pon en valor a implicación dun grupo de ciclistas que “asimilaron que o método de adestramento era o ideal e adheríronse a el totalmente”, incorporando as súas rutinas de traballo as diferentes pautas de adestramento propostas.

Do laboratorio á estrada

Tras unha primeira avaliación global, os integrantes do primeiro equipo do Cortizo irán retornando á facultade ao longo do ano, divididos xa en varios grupos, co propósito de ir avaliando o seu estado de forma en diferentes fases da tempada. Estas probas, recoñece García, estarán xa “moi influenciadas polo calendario de competicións”, máxime nun ano no que o Equipo Cortizo ampliou a súa presenza en probas internacionais incluídas no calendario UCI, como o Circuíto das Ardenas, o Giro de Beldevere ou a Ronde de l’Isard, nas que se mediron aos equipos sub23 das principais escuadras World Tour.

Coa participación das investigadoras e investigadores Alba Cuba, Tania Álvarez, Javier Carballo, Mario Iglesias, Virginia Serrano e do cardiólogo Diego Fernández, estas avaliacións comprenden un conxunto de probas “moi semellantes” ás de tempadas previas, xa que “déronnos moi boa información”, recoñece García. Ao mesmo tempo, un dos obxectivos nesta tempada será o de tratar de “introducir máis probas de campo”, como a levada a cabo en 2024 na contorna de Manzaneda, onde os ciclistas foron avaliados antes e despois da enfrontarse a unha contrarreloxo e a unha cronoescalada, que debían realizar “a máximo esforzo”, monitorizados con potenciómetros e pulsómetros.