O BNG de Vigo esixe cumprir a ordenanza que impide pendurar adornos de Nadal nas árbores

O Bloque Nacionalista Galego de Vigo vén de esixir ao Goberno de Abel Caballero que cumpra a ordenanza municipal de Medio Ambiente que impide pendurar adornos e outros elementos decorativos do nadal no arboredo da cidade. A fronte nacionalista reclama que a celebración destas actividades non se volva traducir, “como en anteriores anos”, en agresións ambientais que vulneran as normativas e poñen en risco elementos patrimoniais que gozan de especial protección.

“O BNG trasladamos na última Comisión Informativa de Medio Ambiente do Concello a nosa esixencia para que garanta o estrito cumprimento e respecto da normativa”, subliñou o concelleiro e candidato do BNG á Alcaldía de Vigo, Xabier P. Igrexas, de vez que lembrou que “as árbores non son postes, senón un elemento esencial do ecosistema urbano que deben ser protexidos como mandata a ordenanza municipal de Medio Ambiente”.

Másnoticias

Zona Franca y Roberto Verino presentan las empresas seleccionadas para su aceleradora ‘ViaTextil’

26/11/2022

La Xunta urge al Gobierno una planificación “decidida” para impulsar el AVE entre Vigo y Oporto

26/11/2022

Igrexas demandou tamén ao Concello de Vigo e á Dirección Xeral de Patrimonio da Xunta de Galiza que confirmen que o mercado de Nadal que se está montando un ano máis na Alameda, o chamado Cíes Market, conta cos permisos e autorizacións necesarias para ser instalado nuns xardíns declarados como Ben de Interese Cultural e que, polo tanto, contan cunha protección integral.

Ademais, o edil nacionalista insistiu na necesidade de que se realice un “estrito control” para que estas actividades non supoñan un prexuízo para a convivencia e o dereito ao descanso, en particular das persoas que residen nos edificios lindeiros, e que foron motivo de protestas veciñais en edicións anteriores. “O Goberno local ten que garantir que non se vai establecer unha lei da selva na que en favor do nadal de Caballero todo se pode facer”, advertiu.

Desde o BNG aseguran que non se pode cuestionar o cumprimento destas normativas, malia as discrepancias das nacionalistas coa “obsesión de Abel Caballero por reducir a cidade a un gran parque temático do Nadal” e de destinar “inxentes cantidades de diñeiro público a esta finalidade”.