O BNG de Vigo pedirá explicacións polas "obras ilegais" para novos chalés "VIP" en Cabo Estai

O BNG de Vigo reclamará este martes na vindeira sesión do Consello que a concelleira María José Caride aclare os motivos polos que o departamento que dirixe deu o visto bo as obras de construcción de chalés en primeira liña de costa en Cabo Estai, que vén de ser anulada pola Axencia de Protección da Legalidade Urbanística (APLU) da Xunta, recollendo as advertencias formuladas pola veciñanza de San Miguel de Oia e polo propio Bloque.

O concelleiro e candidato do BNG de Vigo, Xabier P. Igrexas, valorou que esta resolución da APLU esixe que a responsábel de Urbanismo “dea a cara” por ter permitido de maneira “absolutamente incomprensíbel” as obras de acceso á futura “urbanización de chalés VIP”. Após este ditame, explicou, "non só queda revogada a licenza urbanística, tamén terá que ser reposto o vial construído sobre terreos que non eran titularidade dos promotores e que supón unha aberración ambiental a escasos metros do litoral vigués", sinalan.

Másnoticias

Cuatro años de cárcel por robar en varias casas de Vigo en una misma jornada

12/09/2025

Vigo da el primer paso para revolucionar Praza de España, que será semipeatonal con zonas verdes

12/09/2025

O candidato nacionalista salientou que o BNG leva advertindo durante meses das "irregularidades" desta urbanización, para a que solicitou sen éxito a paralización cautelar das obras. “Choca que se autorizaran actuacións que incluíron aterramentos a moi poucos metros do mar, ou se teña autorizado instalar unha escaleira de formigón directamente sobre as rochas da fachada costeira de Cabo Estai”, lamentou Igrexas.

O concelleiro do Bloque lembrou ademais que esta autorización foi outorgada “no tempo de desconto”, a poucos días de que se decretase a suspensión de licenzas pola aprobación inicial do novo PXOM. “O BNG temos que reiterar que o tempo da barra libre a nivel urbanístico, sobre todo para favorecer intereses de grandes apelidos, ten que darse xa por rematado na cidade”, remachou.