O BNG de Vigo urxe mobilizar a vivenda desocupada para facilitar prezos "accesibles"

O Bloque Nacionalista Galego expresou estee mércores a súa discrepancia ante a “renuncia” do Goberno municipal de Vigo, recollida na proposta de novo Plan Xeral de Ordenación Municipal (PXOM), de actuar para mobilizar a vivenda desocupada na cidade. Propoñen que o Concello de Vigo subscriba convenios coa Sareb e bancos privados para artellar un parque municipal de vivenda de alugueiro.

O concelleiro do BNG en Vigo, Xabier P. Igrexas, advertiu que “a vivenda é un problema social en Vigo” o que está a provocar que moitas familias traballadoras e a mocidade non poidan optar a este ben esencial na cidade. Neste sentido, apuntou que o custo medio dos alugueiros sitúase en 700 euros mensuais e citou varios estudos e informes que recollen que os prezos incrementáronse por volta dun 30% nos últimos cinco anos. “O BNG temos que criticar a nula política de vivenda despregada na nosa cidade tanto pola Xunta do PP como polo Goberno municipal de Abel Caballero”, afirmou.

Másnoticias

Un juzgado condena en Vigo al SEPE a indemnizar con 5.000 euros a una mujer

04/06/2026

El chiringuito de Vigo "con la mejor puesta del sol del mundo" desvela sus nuevos conciertos

04/06/2026

Igrexas asegurou non “poder compartir” a renuncia a mobilizar a vivenda desocupada existente na cidade. “En Vigo hai, arestora, máis de 18.500 pisos baleiros, na súa meirande parte propiedade de grandes grupos financeiros, da Sareb e de bancos privados que foron rescatadas con diñeiro público”, explicou, lembrando que son máis de 5.000 as familias viguesas que están rexistradas como demandantes de vivenda protexida.

Desde a fronte nacionalista volveron reiterar a súa proposta de que o Concello de Vigo poña en marcha unha verdadeira política de vivenda, con medidas concretas, como promover a sinatura de convenios coa Sareb e os bancos para dispoñibilizar a prezos accesíbeis e constituír un parque municipal de vivenda en alugueiro.

“Non abonda con grandes titulares. Lembramos como en 2007 Abel Caballero prometía construír 6.000 vivendas protexidas en catro anos e en 14 non fixo ningunha. É momento de medidas reais e urxentes que permitan poñer fin á expulsión de moitas familias traballadoras que non pode permitirse, literalmente, pagar o prezo da vivenda en Vigo”, remachou Igrexas.