O BNG denuncia que PSOE e PP “amordazan” ao Vigueses Distinguidos deste ano

O Bloque Nacionalista Galego denunciou esta mañá o “veto antidemocrático” co que PP e PSOE van “amordazar” as Vigueses Distinguidos deste ano, impedindo que o Pleno poida votar a proposta formulada pola fronte nacionalista para que este ano se recoñecera con esa honra ao Grupo de apoio do Colectivo Musical "La Insurgencia".

O concelleiro do Bloque en Vigo, criticou con dureza que PP e PSOE sumaran os seus votos na Xunta de Voceiros para impedir que o nomeamento suxerido polo Bloque se incorporase na proposta que se someterá mañá a votación no Pleno da Corporación.

Másnoticias

"En marcha ya la Biblioteca Pública de Teis", el Concello de Vigo licita su construcción

21/08/2025

La flor más especial de Vigo ya se puede ver, aunque por poco tiempo

21/08/2025

Liberdade de expresión

Igrexas lembrou que se trata dun Grupo de Apoio que ten feito un enorme traballo en favor da liberdade de expresión e en contra da causa xudicial que vén de se saldar nunha condena “aberrante e máis propia dun rexime totalitario que dunha democracia que se di consolidada”, con penas de 6 meses de prisión, 8 anos de inhabilitación e multas de 1200 euros contra un colectivo musical polos versos de varias das súas letras. Aliás, o edil nacionalista remarcou que 5 das 12 integrantes de ‘La Insurgencia’ son viguesas e vigueses.

“Non sorprende a posición do PP, pero estamos a ver como o PSOE que prometeu até a extenuación que derrogaría a Lei Mordaza agora lle vira as cotas a un grupo de artistas que ven conculcada a súa liberdade de expresión e creación cunha sentenza inxusta”, afirmou o edil.

Veto antidemocrático

O portavoz municipal nacionalista enfatizou que se trata da “primeira vez na historia democrática da cidade que se veta unha proposta de nomeamento de Vigueses Distinguidos, realizada por unha forza política con representación no Pleno como somos o BNG”.

“Este veto antidemocrático devalúa as máximas distincións do Concello de Vigo, que deixan de ser un recoñecemento de toda a cidade para selo só dunha parte, convertendo as Viguesas e Vigueses distinguidos nunha especie de novo toisón de ouro da orde do Caballerismo” denunciou.

Desde o BNG reclaman respeito cara a “pluralidade e diversidade da cidade” e lamentan que se lle negue ao Pleno a posibilidade de decidir se recoñecía ou non a loita por un dereito democrático fundamental e irrenunciábel como é a liberdade de expresión e creación. “Co seu sectarismo, PSOE e PP amordazan as Viguesas e Vigueses Distinguidos deste ano”, remacha Igrexas.