O BNG pide ao Concello de Vigo que rexeite o “pelotazo” de Porto Cabral

O BNG amosa o seu rexeitamento á construción de Porto Cabral. A fronte nacionalista insta ao Goberno municipal que fecha a porta ao grupo promotor que quere volver poñer en marcha o proxecto dunha grande área comercial e de lecer en monte comunal. Os nacionalistas reclaman ao Executivo que encabeza Abel Caballero que “poña fin á permanente improvisación e opacidade” coa que está a xestionar esta cuestión. Así o manifestou o conselleiro do BNG, Xabier Pérez Igrexas, quen reiterou a “oposición frontal” do seu partido a Porto Cabral. “Nin un só metro de monte comunal pode destinarse a unha operación especulativa, un pelotazo urbanístico, e menos a un macro centro comercial”, asegurou o voceiro.

Igrexas volveu demandar unha moratoria, tanto a nivel municipal como galego, que impida que se conceden novas licenzas para grandes áreas comerciais na cidade nos próximos dez anos. “Se de algo está saturada Vigo é de macrocentros comerciais”, xustificou. Neste sentido, o edil nacionalista criticou que o único modelo produtivo do Goberno local sexa o do “monocultivo de áreas comerciais”. Como exemplo referiu os intentos de “legalizar pola porta de atrás ámbitos como Cruceiro ou Recaré ou o feito de que a Zona Franca, dirixida polo PSOE, queira converter o PTL de Valadares nun parque comercial”.

A fronte nacionalista cuestiona de maneira aberta a inexistencia de “interese público xeral” que poida xustificar o desenvolvemento de Porto Cabral a través dunha ordenación provisional. A este respeito, Igrexas demandou do PSOE que actúa con coherencia. “Coa mesma vehemencia coa que se opoñen á cidade deportiva do Celta e a súa área comercial teñen que dar portazo a Porto Cabral”, reclamou.

O voceiro municipal do BNG vigués subliñou que se a operación especulativa en Mos vai ter, como argumenta o propio Concello de Vigo, un impacto negativo para o tecido comercial da cidade olívica, “maior será o impacto con Porto Cabral”, reiterando que o modelo de grandes áreas é “letal” para o pequeno e mediano comercio, que é, segundo sinalou, “o que fai cidade vertebrando os barrios e as parroquias e crea emprego estábel”.

“O proxecto de Porto Cabral só pode resucitar coa complicidade de PSOE no Concello e do PP na Xunta”, advirten. O BNG vigués aposta, pola súa banda, por facer desa área de monte comunal “unha grande reserva forestal” que poña en valor a importancia que ten o “pulmón verde” que representan os montes para a cidade.