O Campus Auga celebrará en setembro o I Congreso Transnacional da Xuventude Investigadora

Os días 24 e 25 de setembro terá lugar o I Congreso Transnacional do Campus Auga da Xuventude Investigadora (Aquaxi´25). A cita nace “co propósito de ofrecer un espazo de diálogo e difusión de resultados de investigación, promovendo o intercambio de coñecementos, a aprendizaxe compartida e a creación de redes de colaboración entre a nova xeración científica”.

Aquaxi´25 celebrarase no edificio Politécnico do campus de Ourense e está organizado polo Campus Auga, o proxecto de especialización do campus de Ourense acreditado e financiado pola Consellería de Educación, Ciencia, Universidades e Formación Profesional da Xunta de Galicia. O evento conta cun comité organizador formado por un equipo multidisciplinar de investigadoras e investigadores vinculados ao Campus Auga e un comité científico tamén composto por un amplo grupo de persoal investigador de Galicia e do norte de Portugal, en liña coa implicación do Campus Auga no espazo eurorrexional.

Másnoticias

Investigadores do CIM estudan o papel do plancto mariño no almacenamento de CO₂ nos océanos

01/08/2025

El Gobierno anuncia una ayuda de 7,5 millones para la UVigo para fortalecer su área de fotónica

31/07/2025

Este congreso está especialmente pensado para persoal investigador en formación, tanto en etapas predoutorais como posdoutorais. Con todo, a participación está aberta tamén a persoas cunha traxectoria investigadora consolidada que desexen contribuír ao enriquecemento científico e académico do encontro. A elas e eles, Aquaxi´25 quere ofrecerlles “unha oportunidade valiosa para presentar traballos nun ambiente accesible e enriquecedor, favorecendo tanto o desenvolvemento profesional como o crecemento persoal das persoas participantes”.

Tres liñas temáticas

O lema escollido para esta primeira edición é Novos retos en alimentación, agricultura, medio ambiente e augas termais. En consonancia co proxecto do Campus Auga, o congreso estrutúrase en tres liñas temáticas. A primeira é alimentación funcional, abranguendo desde a alimentación sostible, circular e valorización de subprodutos e a biotecnoloxía alimentaria ata a trazabilidade e calidade alimentaria e a dieta e alimentos nutracéuticos. A segunda liña de traballo é agricultura e medio ambiente, abarcando as funcións do solo e servizos ecosistémicos e tamén a agricultura de conservación, rexenerativa e resiliente e a agricultura intelixente. Por último, está a xestión da auga termal, con temas como a xestión dos seus xacementos e os seus usos indirectos e lúdicos. Estas tres liñas de especialización apóianse á súa vez en tres áreas transversais de soporte: intelixencia artificial, economía circular e lexislación agroalimentaria e ambiental.

O prazo para enviar resumos de comunicacións orais ou pósters para participar no I Congreso Transnacional do Campus Auga da Xuventude Investigadora finaliza o 31 de xullo e a data límite para inscribirse é o 31 de agosto. Co obxectivo de recoñecer o talento e o esforzo das mozas e mozos investigadores que participarán neste evento coas súas contribucións, a organización outorgará diferentes premios (ao mellor póster, comunicación oral e idea innovadora) e tres distincións ao mellor traballo predoutoral (incluíndo grao, mestrado e doutoramento e concedendo unha distinción para cada unha das liñas principais do congreso).