O Foro Tecnolóxico de Emprego celebrará 25 anos de historia cunha edición chea de novidades

25 anos de éxito ás costas son moitos para calquera evento, pero sono aínda máis cando se trata dunha iniciativa nacida por e para o alumnado como o é o Foro Tecnolóxico de Emprego. Esta feira, impulsada por estudantes das escolas de enxeñaría do campus de Vigo, celebrará o vindeiro mes de marzo o seu vixésimo quinto aniversario, unha edición que, como avanzan dende a organización, será “moi especial”.

O evento terá lugar os días 11 e 12 de marzo e dende a organización agardan que sexa unha das máis numerosas en cantidade de empresas asistentes. Nesta fiestra ao mercado laboral o alumando poderán entregar os seus currículos ás compañías presentes, coñecer as demandas e tendencias do mercado laboral e asistir a relatorios, mesas redondas e obradoiros.

Másnoticias

Rescatan un velero a la deriva en Vigo que quedó encallado entre unas rocas

11/07/2025

El caso del hostelero de Vigo que expulsó a turistas de Israel llega a la Fiscalía como posible delito de odio

11/07/2025

A clave, o traballo en equipo

Este ano son 17 mozos e mozas os que se encargan da organización do Foro Tecnolóxico de Emprego, tres da Escola de Enxeñaría de Minas e Enerxía, tres da EE Industrial e once da EE de Telecomunicación. Á fronte do grupo está Iago Vázquez Quiroga, alumno do Máster de Enxeñaría Industrial, e xunto a el conforman o equipo directivo José Luis Rodríguez Rodríguez, estudante de  4° curso de Enxeñaría de Telecomunicación, como coordinador de Organización, e Belén Parente Artime, alumna do Máster de Enxeñaría de Minas, coordinadora de Comunicacións.

Aínda que este é o seu primeiro ano como coordinador xeral, Iago Vázquez conta cunha ampla experiencia dentro do equipo do foro, xa que na pasada edición tivo as responsabilidades de coordinador de patrocinios e no anterior era colaborador. “Dende o primeiro ano que formo parte o equipo, sabía que era unha oportunidade única para poder coñecer empresas punteiras do sector tecnolóxico, cando formas parte do equipo tes unha relación moi próxima con todas e valoran moito que te impliques na organización do evento”.

Para Iago Vázquez o segredo que hai detrás do Foro Tecnolóxico de Emprego e a clave para que cada edición supere á anterior é “un gran traballo en equipo sumado a unha gran coordinación. É típico dicilo, pero a chave do éxito reside no grande equipo que se forma cada ano, a pesar de sufrir grandes cambios, todos os anos o espírito Foro mantense entre todos os integrantes, todos traballamos para que o evento sexa o mellor posible”. En total, entre todas as edicións pasadas foron arredor de 250 os mozos e mozas que investiron o seu tempo na organización destes evento, que se celebrou incluso durante a pandemia cunha edición totalmente virtual.

Unha oportunidade única de establecer contacto co tecido empresarial

O obxectivo do Foro Tecnolóxico de Emprego é facilitar unha conexión directa entre empresas e estudantes, permitindo a captación de talento para prácticas, traballos fin de grao e de mestrado e oportunidades laborais. Durante as dúas xornadas do evento as e os asistentes poderán achegarse aos postos das empresas, nos que se recollen currículos e se establecen posibles oportunidades laborais. O programa inclúe tamén workshops que permiten o desenvolvemento de habilidades e competencias e conferencias técnicas nas que se presentarán temas seleccionados por estudantes a través de enquisas previas.

Para o coordinador xeral é, en resumo, o mellor evento que teñen os estudantes para coñecer e falar de ti a ti coas empresas do sector tecnolóxico.  “Aínda sendo de primeiro de grao, poden comezar a falar con empresas do seu interese, para coñecer mellor que fan e que prácticas ou traballos ofrecen. Canto antes comecen, antes perderán o medo a falar coas persoas responsables de recursos humanos, ademais de ter acceso a mellores oportunidades laborais”.

Unha edición especial na que se agardan máis de 50 empresas

O equipo deste ano ten ante si o reto de poñer en marcha a que probablemente sexa a edición máis especial ata o momento e recoñecen que está a ser un proceso moi intenso. “Dende setembro que conformamos o equipo, todas as semanas temos tarefas para ir avanzando na organización e xa comezamos coa inscrición das empresas e dos colaboradores”, explican. Ademais, compaxinar todo este traballoo coas actividades académicas “non é fácil, pero grazas a todo o grande equipo e unha boa organización é posible”, recoñece Iago Vázquez.

Con tres meses por diante para acabar de darlle forma á edición do 25 aniversario, dende a organización adiantan que este ano será “moi especial, temos preparadas moitas novidades para o evento”, sen querer dar máis detalles. O que si avanzan é que será unha edición moi numerosa, xa que agardan contar con máis de medio de cento de empresas, que estarán a disposición do alumnado durante os dous días que durará o evento.