Os catedráticos da UVigo Laura Carballo e Juan Pou, Medallas de Investigación da RAGC

A catedrática de Dereito Internacional Privado e decana da facultade de Relacións Internacionais da Universidade de Vigo, Laura Carballo Piñeiro, e o tamén catedrático de Física Aplicada da institución académica viguesa Juan Pou Saracho recibirán as Medallas de Investigación que outorga a Real Academia Galega de Ciencias (RAGC) en recoñecemento as súas traxectorias singulares e consolidadas en investigación, desenvoltas en Galicia, ademais de fomentar a promoción da ciencia e a tecnoloxía galegas. Carballo e Pou recibirán cadansúa distinción, xunto aos tamén galardoados investigadores da UDC, Nieves Rodríguez Brisaboa, Francisco J. Blanco García e María Carmen Veiga Barbazán, nun acto que se celebrará o 8 de outubro en Santiago de Compostela, co gallo do Día da Ciencia en Galicia.

“Un apoio fundamental ao Dereito”

Laura Carballo (Marín, 1971) recibirá a medalla Domingo García-Sabell Rivas, da sección de Ciencias Económicas e Socias da RAGC polo seu traballo de investigación que ten como liña principal o Dereito laboral marítimo internacional, “da que é un referente”, sinala a Real Academia Galega de Ciencias.

Másnoticias

atlanTTic celebrará a vindeira semana 15 anos impulsando a innovación en telecomunicacións

14/11/2025

La Semana de Cine Submarino de la UVigo ofrece más de una decena de proyecciones gratis en la ciudad

13/11/2025

"Como investigadora galega síntome moi honrada. Reconforta que nestes intres de grande ameaza para a orde internacional e os dereitos das persoas sen importar a súa orixe, a RAGC apoie o papel fundamental do Dereito para acadar a paz, a seguridade e o benestar de nacións, a dignidade dos pobos, en definitiva, como diría García-Sabell”, salienta Carballo. Catedrática de Dereito e Política Laboral Marítima na World Maritime University, creada pola Organización Marítima Internacional (OMI), con sede en Malmö, e da que foi directora do seu departamento de Dereito e Política Marítima, Laura Carballo participou nun consorcio internacional para prover á Dirección Xeral de Transportes da Comisión Europea dun estudo sobre os aspectos sociais dentro do transporte marítimo.

Para a Federación Europea de Traballadores do Transporte realizou un proxecto sobre seguridade social e emprego marítimo e dirixiu un programa destinado a promover o traballo decente a bordo de buques da mariña mercante. A actual decana da facultade de Relacións Internacionais da UVigo participou nun estudo sobre os horarios de traballo no mar, que suscitou que varios países solicitaran á OMI que puxera en marcha as súas recomendacións. Ademais, a OMI contou cos seus coñecementos para prestar formación en transporte marítimo en Ghana e Chile. Asesora do Comité de Expertos na Aplicación dos Convenios e Recomendacións da Organización Internacional do Traballo, Laura Carballo vai ser a primeira galega en impartir un curso na Academia de Dereito Internacional da Haia.

“Un recoñecemento á investigación sobre as aplicacións do láser en Galicia”

Juan María Pou Saracho (A Guarda, 1963), catedrático de Física Aplicada da UVigo, recibirá o vindeiro 8 de outubro a medalla Isidro Parga Pondal da sección de Ciencias Técnicas da RAGC. “Referente internacional no eido das aplicacións láser”, sinala a Real Academia, as liñas de traballo de Pou céntranse na industria, a saúde e a sostibilidade; con preto de oito millóns de euros acadados en proxectos e contratos e 34 patentes.

“Este galardón é un recoñecemento a todas as persoas que desde os anos 1980 se dedicaron e seguen a dedicarse a investigar sobre as aplicacións do láser en Galicia e, en particular, ao noso grupo da Universidade de Vigo. Agradézolle aos meus compañeiros do Cintecx por crear un magnífico ambiente de traballo para desenvolver a nosa investigación”, sinala Pou, de quen a RACG destaca os seus traballos de valorización dos produtos e residuos xerados nas cadeas de produción vencelladas ao mar, como o aproveitamento de espiñas e ósos de peixe para obter fosfatos de calcio. A mellora da eficiencia dos sistemas mecánicos empregados nas artes de pesca e de produtos e servizos nos sectores da automoción, construción naval, aeronáutico, téxtil e da pedra natural para obter unha industria intelixente e sostible; o desenvolvemento de novos produtos para as industrias farmacéutica e biotecnolóxica ou a obtención de próteses e implantes con propiedades mecánicas melloradas, son outras liñas de traballo destacadas da actividade investigadora desenvolvida polo catedrático da UVigo.

Así mesmo, a RAGC destaca a participación de Pou nun proxecto europeo centrado no uso da tecnoloxía láser para reciclar o vidro que non se recicla, como o empregado en produtos farmacéuticos ou en dispositivos electrónicos como teléfonos móbiles e pantallas de ordenador.