Pontón inicia en Vigo a precampaña das europeas: "Somos o equipo que defende as cores de Galiza"

O BNG deu este domingo o pistoletazo de saída á precampaña das eleccións europeas cun acto en Vigo, cidade na que foi a primeira forza política nos comicios galegos. De cara a próxima cita coas urnas, a portavoz nacional, Ana Pontón, proclamou que "o BNG é o equipo da casa, a candidatura de País".

“É a candidatura que os galegos e as galegas poden sentir como propia porque somos o equipo da casa, o único que vai defender as cores de Galiza, desde a razón e desde o corazón, con toda a nosa a forza”, proclamou Pontón, poñendo como aval o traballo da candidata Ana Miranda, “a voz enérxica, incansable e irredutible de Galiza en Bruxelas”.

Másnoticias

El Rallye Rías Baixas toma el centro de Vigo con adrenalina, coches top y muchas expectativas

03/07/2025

El centro comercial de Vigo donde podrás ganar una Vespa si vas de rebajas en sus más de 100 tiendas

03/07/2025

Pontón subliñou o "inxente labor" da candidata que "cada vez que tomou a palabra foi para falar de Galiza, dos problemas reais da xente real”, en contraste cun PP que, dixo, mesmo ten votado en contra dos intereses do País. Por iso, “o escano do BNG foi o escano do pobo galego e así seguirá con máis forza a partir do 9X”, subliñou, “porque Galiza ten que ter voz propia en Europa para facerse escoitar, para defender os intereses da xente do mar e do rural, do noso medio ambiente e territorio, unha voz a favor dos dereitos sociais e da clase traballadora”.

“A lealdade do PP de Rueda está na rúa Génova, co lobby eléctrico, coas súas empresas amigas e cunha monarquía corrupta, caduca e antidemocrática”, denunciou para contrastar co BNG que ten como "única lealdade" a Galicia.  Pontón avanzou que o Bloque desenvolverá unha campaña "cen por cen galega" sen permitir que nada o desvíe dese obxectivo, tras advertir que "o PP repetirá a mesma campaña sucia das eleccións galegas".

“Diante dun PP empeñado en enlamar o debate, no BNG falaremos de pesca, do prezo do leite, de como ter un rural vivo; fronte a un PP instalado no insulto e na mentira; nós de cambio climático, do futuro da xente moza; fronte a un PP sen alternativas, falaremos das nosas propostas para defender os intereses de Galiza en Europa. Esa é a campaña que merece a cidadanía; 100% centrada neste País e na súa xente, 100% galega”, proclamou.

Con voz e voto

A líder nacionalista defendeu o dereito de Galicia a estar presente na Unión Europea “con voz e voto” cando se negocien asuntos que afectan directamente, en particular no relativo ós sectores produtivos, “porque ninguén mellor que nós para defender o noso”, alegou.

Pola súa banda, a número un na lista do Bloque ás europeas, Ana Miranda, referiuse ao escano do BNG en Bruxelas como “o escano que defende os intereses de Galiza e que o fai libre, sen intermediarios”. “Ao único que lle temos que dar contas é ao Pobo galego!”, proclamou durante a súa intervención no Auditorio Mar de Vigo.

Miranda subliñou o “férreo compromiso co País” no traballo que o Bloque vén desenvolvendo dende o ano 1999 trasladando ao Parlamento Europeo e á Comisión as problemáticas e demandas “dos nosos sectores produtivos, dos nosos concellos ou das diferentes loitas sociais que houbo na terra e no mar”, dixo logo de referirse, entre outras cuestións, ao accidente do Alvia, ao Prestige, a crise dos pellets, a defensa da lingua, os intereses da pesca galega ou, máis recentemente, a loita contra a instalación da pasteira de Altri en Palas. “Se estiveron presentes no Parlamento Europeo todos estes temas, cos enfoques que son relevantes para o País foi grazas ao BNG”, salientou.

Miranda non esqueceu no seu discurso o “inmoral e cruel xenocidio” de Israel en Gaza e, tomando as verbas de Pepe Mujica, ao que visitou recentemente, manifestou “ningunha causa mundial nos é allea, hai que pensar na humanidade enteira”. “Non pode ser que a UE cruce los brazos diante deste xenocidio”, criticou durante un discurso que aproveitou para renovar o seu compromiso de traballar en Bruxelas “por Galiza e pola humanidade”.