Redondela pon en marcha un plan de obras de 742.000 euros co foco posto nas parroquias

O Pleno da Corporación Municipal de Redondela deu esta semana luz verde ao investimento de 741.758,89 euros do Remanente de Crédito para a realización de obras en viais públicos, instalacións deportivas, medio ambiente e saneamento, “obras todas elas de extraordinario interese para a veciñanza e que permitirán a mellora de infraestruturas cos conseguintes beneficios que iso ten para a calidade de vida das veciñas o veciños”, puntualiza a alcaldesa Digna Rivas.

Entre as obras previstas, destaca o investimento de 287.507,36 euros para a mellora do espazo deportivo en Chapela. Trátase, concretamente, do espazo coñecido como o campito, unha zona moi utilizada pola infancia e mocidade da parroquia e que se atopaba en malas condicións. Precisamente a mellora do campito era unha das propostas que a rapazada trasladou ao Concello no Pleno do Consello da Infancia e a Adolescencia. O Concello renovou o contrato de alugamento que tiña sobre dio espazo deportivo –que remataba en maio deste ano– por outros trece anos para poder realizar todos os traballos de mellora programados.

Másnoticias

Redondela avanza un terremoto de planes por Navidad con música, circo, Papá Noel y fiesta Pre Fin de año

24/11/2025

Redondela, feliz por el adiós del paso a nivel de Cesantes y el futuro apeadero de Chapela

23/11/2025

O Goberno local destinará outros 454.251,53 euros a obras que contribuirán a mellorar diferentes infraestruturas de alumeado público, estradas e camiños municipais, saneamento e medioambiente e que buscan dar ás parroquias “os servizos dignos dos que estiveron privados durante moitos anos”.

Así, en materia de mellora viaria, realizaranse para o acondicionamento Baixada ao Peirao e acondicionamento do camiño da Furna, camiño da Estación de Chapela e camiño do Subido en Chapela. Amais realizaranse obras de mellora na rúa Outiz de Abaixo, na Portela e na rúa Torre de Calle de Cesantes. Nos Valos (Saxamonde), mellorarase o paso superior PK 161+500 da liña 810 Adif e tamén dentro destes traballos de mellora viaria, inclúese o retranqueo na Baixada a Estación, O Cairo.

No que ás actuacións medioambientais fai referencia, traballarase na reparación do socavón no río Maceiras e elevación e ampliación da antiga ponte e a elevación da actual ponte sobre o Maceiras.

A rexedora local subliñou a importancia das accións que se van a realizar nas parroquias “dende sempre as grandes esquecidas dos anteriores gobernos”. A alcaldesa agradeceu o apoio de AER e BNG a estes investimentos.