O Rosal quere converter o espectacular Magnolia Soulangeana en árbore senlleira

O Rosal quere converter o espectacular Magnolia Soulangeana de San Miguel de Tabagón en árbore senlleira. O Concello aprobará este xoves 25 en pleno (ás 20.30 horas no salón de plenos do Concello) a solicitude para incluír este exemplar no Catálogo de Árbores Senlleiras de Galicia, un rexistro público dependente da Consellería de Medio Ambiente, Territorio e Vivenda no que figuran todas aquelas árbores e formacións que merecen unha protección especial en atención ás súas características singulares ou excepcionais. “Para nós é moi importante que se recoñeza a riqueza histórica, ambiental e patrimonial que temos no Rosal”, salientou a alcaldesa, Ánxela Fernández. Situada en propiedade privada o Concello quere agradecer a implicación e colaboración inestimable dos propietarios.

A solicitude busca poñer en valor diferentes aspectos desta árbore, como a súa dendrometría, xa que o magnolio de San Miguel de Tabagón é o máis grande de Galicia e un dos máis grandes de toda Europa ao contar cun tronco de 3,13 metros de diámetros e 30 metros de copa. Outro das características que chama a atención deste exemplar é a súa vitalidade, sobre todo na súa floración e tamaño, moi superior ao que se recolle na bibliografía.

Másnoticias

La muralla medieval que resurge con el proyecto de reforma de una plaza en Tui

26/10/2025

Tui disfrutará de una gran fiesta gastronómica para los amantes del churrasco

25/10/2025

Unha enerxía que se ve reflectida tamén no efémero espectáculo da súa floración anual, con fermosas flores rosadas que poden chegar a contemplarse incluso dende a outra beira do Miño. Trátase dun espectáculo anual que se achegan a ver e admirar numerosas persoas e fotógrafos, xa que moitas veces as súas imaxes aparecen publicadas en diferentes medios. Cabe destacar ademais, que a árbore aparece representada na obra do pintor Xavier Pousa.

A árbore ten interese ademais polo conxunto da súa situación e historia, xa que ten ao seu carón outras árbores centenarias de porte considerable e crece á beira dunha casa construída a finais do século XVIII.

O Rosal é terra de árbores senlleiras. As últimas en sumarse ao catálogo foron as do conxunto de sobreiras da Ermida da Madalena, que foron incluídas o pasado mes de abril. Ao formar parte do Catálogo de Árbores Senlleiras de Galicia garántese a protección e conservación dos exemplares e conxuntos, o que implica a prohibición de calquera acción que poida afectar negativamente á súa integridade, saúde ou á súa aparencia.