Denuncian a suspensión de concertos en Vigo por parte da Policía Local

A plataforma de artistas musicais Grupos de Vigo en Loita critica os peches de concertos acústicos que a Policía Local viguesa estivo efectuando nas últimas semanas. O pasado sábado sucedeu no Al Traste Rock Bar de Rúa Torrecedeira, ás tres cancións de comezar o concerto acústico do grupo Other Game en sesión vermut, programado para as 12:30 do mediodía. Por outra banda, o venres 14 de outubro, segundo expuxo en redes sociais o Nuevo Bonus Track de Rúa Pi y Margall interior, a Policía acudiu a este bar a deter un suposto concerto que non se estaba a producir nin estaba programado. Este mesmo establecemento, que está insonorizado, sufrira a semana anterior a suspensión doutro concerto acústico.

Segundo afirman dende a plataforma Grupos de Vigo en Loita, estes son dous exemplos dunha situación que se vén dando dende hai moito tempo debido ás deficiencias na regulación dos locais de concertos en Vigo. En palabras do colectivo de músicas e músicos vigueses, a falta de concesión de licencias axeitadas aos locais de concertos fai que “nos poidan cancelar as nosas actuacións durante o día pola mera chamada dalgún veciño, ou simplemente porque os responsables da Policía manden unha patrulla e ordenen parar, independentemente do volume e dos horarios”.

Másnoticias

La Reconquista y otros 10 planes para despedir el último fin de semana de marzo en Vigo y su área

23/03/2023

Albufeira elige Vigo para mostrar en Galicia los encantos de este icónico enclave del Algarve

23/03/2023

Esta situación estaría encadrada, para Grupos de Vigo en Loita, nunha tendencia de desinterese e desleixo das autoridades cara a escena musical en Vigo e os seus artistas emerxentes, manifestada en capítulos anteriores como os peches das diferentes salas de ensaio municipais ou a case ausencia de grupos de Vigo na programación municipal. Isto ten, afirman, efectos moi negativos para o panorama cultural da cidade no seu conxunto, como veñen denunciando noutras ocasións con anterioridade.

O propio colectivo sufriu esta situación nas súas propias carnes durante a celebración dun concerto na Sala Molotov, en Travesía de Santiago de Vigo. Grupos de Vigo en Loita organizara aquel concerto o día 3 de xuño para reivindicar a mellora das condicións das salas de ensaio de Vigosónico e o apoio do goberno municipal ás bandas locais. Porén, ás 21:00 da tarde, xusto cando comezaba o concerto, a Policía Local xa estaba na porta ordenando o peche, a pesar de tratarse dunha sala insonorizada que ten actividade de ocio nocturno con total normalidade e sen que houbese tempo posible para que ningún veciño emitise ningunha queixa. Por iso, para este colectivo, as suspensións recentes non son se non a continuación dunha tendencia que vén dende moi atrás.

Grupos de Vigo en Loita xurdiu como plataforma o 11 de xaneiro deste ano, inicialmente para protestar polo peche definitivo das salas de ensaio municipais de Vigosónico. Despois de meses de protesta a través de diferentes accións, logrouse a reapertura das instalacións, e, posteriormente, a posta en funcionamento das salas de ensaio a principios do mes de maio. A pesar de ter logrado o seu principal obxectivo fundacional, continúan a súa andaina reivindicando, en varias ocasións con notable éxito, melloras nas condicións do servizo, mermado con respecto á súa situación anterior á pandemia, entre outras reivindicacións relativas á escena musical viguesa.