“Non contaxian, pero enganchan”: a Feira do Libro de Vigo regresa coa nova normalidade

Vigo celebrará finalmente a súa Feira do Libro. A cita chegará ao centro da cidade, á rúa do Príncipe, este xoves 25 de xuño e rematará o 4 de xullo. Prevista inicialmente para marzo e adiada pola pandemia do coronavirus, finalmente a literatura galega regresará á cidade.

Será máis cativa, con menos actividades pero coa mesma intensidade e amor polas letras. A Feira do Libro de Vigo será a segunda en celebrarse tras a volta a “nova normalidade” e contará este ano con seis librarías participantes (Librouro, Cortizas, Nobel Gran Vía, Pedreira, Hobbit e A Cata Tola) así como co Centro de Documentación Feminista de Vigo e a Biblioteca Neira Vilas. Como de costume, haberá desconto do 10% nos exemplares.

Másnoticias

De triunfar en los premios Goya a Vigo, la ciudad acoge durante cinco días un gran evento de cine

03/04/2025

Gastronomía y cultura se dan cita en Vigo con un encuentro para el paladar y el alma

03/04/2025

Segundo explicou o presidente da Agrupación de Libreiros de Vigo, Xurxo Patiño, co gallo de manter a máxima seguridade sanitaria poranse en marcha diversos protocolos de distanciamento social e hixiene que inclúen centralizar as firmas de libros en dúas casetas, non programar actividades paralelas ou aplicar unha desinfección diaria aos postos con luz ultravioleta. Tamén haberá xel hidroalcohólico e se garantirá o distanciamento. Neste mesmo senso, o director xeral de Políticas Culturais da Consellería de Cultura, Anxo Lorenzo, lembrou que “os libros e os documentos non contaxian nada, xa o di o lema da feira”.

Ao longo de dez días programaranse 55 sinaturas de libros que contarán coa presenza de escritores e escritoras como Anxo Fariña, Elba Pedrosa, Lara do ar, Isabel Blanco, D’Angelo, Najla Shami, Manuel Rivas, Francisco Castro, An Alfaya ou Ledica Costas, entre outros. As casetas estarán abertas de 11:00 a 14:00 e de 17:00 a 21:00 horas e a inauguración oficial terá lugar o xoves 25 ás 13:00 horas da man da escritora María Xosé Queizán.

Durante a presentación da XLVI edición da Feira do Libro de Vigo, Abel Caballero destacou o labor dos libreiros e do sector como "importante plataforma de transmisión de cultura" e puxo en valor a situación do evento na rúa do Príncipe, diante do MARCO, "no corazón da cidade". Así, convidou a "todo Vigo" e a todos os municipios da contorna a achegarse a gozar da feira e da cultura do libro en Vigo.