O Festival de Cans inicia a súa xira por nove cines de Galicia

O Festival de Cans bota a andar este mércores Cans Expandido, un formato inédito que servirá para levar as curtametraxes que participaron nas sección de Ficción e Animación da competición oficial do XVII Festival de Cans, celebrada a pasada semana, a nove salas de cine de toda Galicia.

O proxecto Cans Expandido ten por obxectivo incrementar a visibilidade das curtametraxes, ante a redución de aforo que tivo que aplicar o festival para adaptarse á normativa Covid. Os filmes chegarán a 8 cineclubes de toda Galicia e máis á sala de proxeccións do Centro Galego das Artes da Imaxe (CGAI), na Coruña.

Másnoticias

O Porriño se vuelve viral tras enamorar a un popular influencer, "de los lugares más bonitos de España"

04/06/2026

Escolares de O Porriño se suman a la "Operación Ola" para disfrutar de jornadas de surf

03/06/2026

As proxeccións comezarán o día 9 nos cineclubes de Cangas, o Lumière de Vigo, e o CineClube Adega de Vilagarcía de Arousa. O día 10 chegan á sala de proxeccións do Centro Galego das Artes da Imaxe (CGAI) na Coruña e máis ao CineClube Groucho Marx do Barco de Valdeorras. O día 11 de setembro ao CineClube Os Papeiros de Chantada e por último, o día 12, ás salas dos cineclubes Val Miñor AG de Nigrán, ao Padre Feijoo de Ourense e ao CineClube do Carballiño.

Esta iniciativa, innovadora entre os festivais españolas, chega xusto no ano no que por motivos sanitarios Cans tivo que reducir sensiblemente o seu aforo. A suma de esforzos do Festival de Cans, a Federación de Cineclubes de Galicia (FECIGA) e máis o propio CGAI permite levar as obras proxectadas no Festival a máis de 1.050 butacas de salas repartidas por toda Galicia.

En cada unha das sesións exhibiranse as 13 curtas que forman parte da sección oficial de ficción e animación do Festival de Cans. Cada unha das proxeccións terá un prezo de 4 euros, e a suma total da taquilla destinarase ao Premio FECIGA, que irá parar á curtametraxe elixida por un xurado formado por membros dos cineclubes de Galicia. Este galardón non estaba inicialmente previsto nas bases e facilita xerar un apoio económico adicional para o equipo que desenvolveu o filme vencedor.

O proxecto Cans expandido tamén contempla a difusión en liña e mediante pago por visión na web do certame entre os días 13 e 17 de setembro.

Curtametraxes participantes

Entre as películas que se proxectarán están Xoves de comadres, de Noemí Chantada, a gran vencedora do Festival de Cans, con 4 galardóns, e 16 de decembro, de Álvaro Gago, que obtivo dous premios.

Neste formato expandido, o público tamén poderá ver Todo el mundo se parece de lejos, de Rafa de los Arcos e que lle valeu á actriz Bruna Cusí o premio a mellor interpretación feminina; Mentres iso pasa, dirixida por Nacho Ozores na que o traballo de Denís Gómez foi recoñecido coma a mellor interpretación masculina; a curtametraxe Conte Trencat, de Miguel Gago, que lle valeu a Mario G. Cortizo o premio á Mellor Banda Sonora.

Os afeccionados á animación poderán desfrutar El Gran Corelli, de Abel Carbajal, que levou o premio nesa categoría en Cans. Competía con Realty, de David Fidalgo Omil, e coa cinta Season, da realizadora italiana afincada na Coruña Giovanna Lopalco.

Completan o cartel Mare, de Guille Vázque, un traballo de corte experimental; a película Blacks or Whites, de Anita Pico; a cinta Papá, por qué quitas a música?, de Ariadna Cordal; a curtametraxe Baladas de Amor e Morte, da dúas veces finalista en Cans Iria Ares; a animación Hijos del cuerdo de Borja Santomé, que xa fora gañador do Premio do Xurado na categoría de animación.

Festival de Cans Expandido

Adega de Vilagarcía: Día 9 ás 21:00 horas
C.C. Cangas: 9 e 10 ás 21:00 horas
C.C. Carballiño: 12 e 13 ás 20:00 horas
C.C. Padre Feijoo (Ourense): 12 ás 18:00 horas
C.C. Groucho Marx (O Barco de Valdeorras): 10 ás 21:00 horas
C.C. Val Miñor AG de Nigrán: 12 ás 19:00 e 21:00 horas
C.C. Os Papeiros (Chantada, Lugo): 11 ás 20:00 horas
C.C. Lumière-Vigo: 9 ás 20:00 e 21:30 horas
CGAI - A Coruña: 10 e 11 ás 19:30 horas