Así é “Readmirando a condición”, o novo tema de Sés que nos enfronta as nosas contradicións

En xullo de 2011 chegaba as tendas un novo disco titulado “Admirando a condición”. Era o primeiro álbum de estudo de María Xosé Silvar, ou máis ben, de Sés. Agora, seis anos despois, a cantaoutora bergantiñá dálle unha volta a ese primeiro disco. (Re)edítao, (re)faino e (re)admírao.

Este primeiro de decembro, Sés volve cun novo tema ollando ese primeiro disco. Chega cunha peza inédita, “Readmirando a condición”, que abre o seu xa quinto disco que suma ademais as once cancións dese primeiro álbum.

A cantautora galega, que fai soamente un ano presentaba un novo disco “Opoñerse á extinción”, marcado polo blues e o rock máis autóctono, reedita agora o seu primeiro álbum con este tema inédito marcado, como de costume, pola denuncia social chea de actualidade.

Así, en “readmirando a condición” Sés tira de refraneiro popular para “rir por non chorar” ante as incoherencias, amansamento e falta de xuízo crítico da sociedade.

“Que morra a coherencia, benvidos os farsantes” porque “non hai necesidade de recapacitar”. O novo tema enfróntanos as nosas contradicións máis profundas coa musicalidade habitual dunha das máximas expoñentes da música galega contemporánea.

Onde mercar o novo disco de Sés?

O novo álbum poderase mercar a partir de 1 de decembro na súa páxina web oficial e tamén no Culturgal que esta fin de semana se celebra en Pontevedra, onde estará asinando discos.