Tanxugueiras cumpre o desexo dos eurofans e presentará tema en galego para Eurovisión

O galego podería estar máis preto de soar no Festival de Eurovisión que terá lugar en Italia en 2022. Tanxugueiras confirmou este martes que presentará tema para representar a España no evento. Será un tema “en galego, con pandeiretas e coa nosa sonoridade, abofé que si”. Hai que lembrar que hai varias semanas, o trío que forman Aida Tarrío e as irmás Sabela e Olaia Maneiro foron as favoritas dos eurofans españois co seu tema “Figa”.

“Figa”, o rompedor tema que o grupo lanzou o pasado 9 de xullo, foi o elixido na votación lanzada por Eurovision-Spain e, segundo explican no portal especializado, “impúxose en todas e cada unha das votacións da sondaxe organizada durante este verán”. Sabela Maneiro, Aida Tarrío e Olaia Maneiro lograron este éxito entre os fans do festival europeo cun tema que aposta pola proxección do canto e da música tradicional do noso país a través da súa reformulación e da súa confluencia con sonoridades electrónicas. Figa, cuxo nome remite ao emblemático amuleto contra o mal de ollo, bebe de coplas e simboloxías tradicionais, mesturadas con líricas de creación propia, coa intención de incidir na forza e na capacidade das mulleres á hora de afrontar a súa vida, alén das envexas, medos e críticas derivadas dun sistema marcadamante machista. Con este tema, Tanxugueiras quere rachar novamente cos estereotipos e salientar a caza de bruxas á que foron sometidas as mulleres ao longo dos séculos e que, a día de hoxe, segue a existir en multiples contextos; á vez que poñen de manifesto como agroman, desde o máis fondo, o empoderamento, a sororidade e a valentía feminina.

Másnoticias

La viguesa Dani y el compostelano Ortiga conforman el cartel del Sonora’ 2.3 de la UVigo

21/03/2023

Vigo suma otro gran concierto para el verano: el mítico Paul Weller actuará en la ciudad el 16 de septiembre

20/03/2023

Nunca na historia de Eurovisión o noso país enviou un tema en galego. Esta edición podería ser a primeira na que se escoitase un idioma cooficial no noso país. A votación de Eurovisión-Spain demostra o cambio de sentir entre os eurofans españois e amosa o camiño que debería seguir TVE para elixir un tema que represente a España na 66ª edición do festival que se celebrará en Italia.

TVE anunciou que este ano relanzará o Festival de Benidorm para elixir o representante español.  Será un “gran evento musical” que se celebrará a comezos de 2022 e que constará de tres galas. A vitoria dun tema en galego nunha das webs de referencia dos fans españois do festival podería anticipar unha revolución na preselección que podería levar un tema en galego a soar en toda Europa.