Vigo acolle a presentación do poemario de Cesáreo Sánchez Iglesias

"Tempo transfigurado: o canto das sereas" é o novo poemario de Cesáreo Sánchez Iglesias, publicado na colección Tambo do selo Faktoría K de Libros, de Kalandraka. Presentarase o vindeiro xoves 18 de xaneiro ás 20:00 horas na libraría Cartabón (Urzáiz, 125) de Vigo nun recital aberto ao público no que o autor estará acompañado pola escritora Ledicia Costas e polo director de Tambo, Luís Rei Núñez.

Con esta obra, Cesáreo Sánchez Iglesias emprende unha viaxe arredor da música: os 70 poemas deste libro están inspirados nas melodías doutros tantos compositores de moi diversas cronoloxías e estilos, dende Schubert e Vivaldi ata Bob Dylan e Patti Smith, pasando por Marcial del Adalid e Andrés Gaos. Os instrumentos, comezando pola propia voz, os temas tratados -que conforman a banda sonora da humanidade- e mesmo as biografías dos creadores, están presentes nestes versos.

Másnoticias

El Celta ya conoce las fechas y los horarios de todos sus partidos de la Europa League

30/08/2025

Un nuevo local de Vigo aspira a ofrecer las tortillas más irresistibles con una receta "peligrosamente buena"

30/08/2025

Paralelamente, o poeta evoca a pegada das persoas amadas e que tamén o amaron, facendo de "Tempo transfigurado" un crisol de sentimentos e de sensacións pasadas. Trátase dun camiño interior lírico no que o autor aborda a soidade, a introspección e a aceptación das orfandades emocionais.

Activista cultural de ampla traxectoria, fundando e encabezando colectivos comprometidos con Galicia, Cesáreo Sánchez Iglesias foi director de edicións de A Nosa Terra e actualmente preside a Asociación de Escritoras e Escritores en Lingua Galega (AELG). Estreouse como poeta en 1978 coa obra “Silencios e conversas de inverno”. Dende entón, ao longo das últimas catro décadas, vén cultivando este xénero literario, no que publicou títulos tan sobranceiros como “Ortigas da memoria” (1985), “O rostro da terra” (1996), “O rumor do distante” (2001, Premio Esquío), ou “Caderno do Nilo” (2013, Premio Losada Diéguez).

"Tempo transfigurado" é o décimo volume de Tambo, que tamén acolle os poemarios dos galegos Manuel Álvarez Torneiro -Premio Nacional de Poesía 2013-, Xavier Seoane, Martín Veiga, Luis Rei Núñez e Lucía Novas, xunto coa obra do catalán Antoni Marí e do vasco Joseba Sarrionandia, entre outros autores.