A primavera (cultural) comeza mañá na Universidade de Vigo

Tras o aperitivo da actuación da banda coruñesa ChotoKoeu, este mércores arranca no campus de Vigo a programación cultural de primavera 2018 coa Mostra Internacional de Teatro Universitario, Miteu, como prato forte, un clásico do calendario universitario que este ano cumpre vinte anos traendo á cidade exemplos do teatro feito nas aulas de ensino superior, tanto europeas como doutros continentes. É o prato forte, pero non o único, o menú inclúe tamén propostas musicais con grupos emerxentes e bandas consolidadas e, como vén sendo habitual, cine en versión orixinal, nesta ocasión coa resistencia como eixe temático central dos filmes.

A nova programación cultural arranca este mesmo mércores coa estrea da XX edición da Miteu, será ás 18.30 horas no Teatro Vidal Bolaño da Cidade Universitaria coa representación da obra Veciños a cargo da Escola Superior de Arte de Galicia, ESADg, e tamén cunha nova edición, e xa van oito, do ciclo de Cine e Lingua Let’s go to the flicks coa proxección da película North Country (Niki Caro, 2005).

Másnoticias

As Olimpíadas Nacionais de Teleco reúnen en Vigo a máis 200 estudantes de ensino medio

24/04/2025

Playas vírgenes, un cementerio o un histórico faro, una ruta única en Galicia con salidas desde Ourense y Vigo

23/04/2025

Sete semanas de teatro universitario

As actuacións da XX edición da Miteu serán ás 18.30 horas no Vidal Bolaño e prolongarase ata finais de abril. Nesta ocasión a mostra traerá ao campus a actuación de sete grupos: cinco galegos, un de Navarra e unha formación de Marrocos, que será a encargada de pór o toque máis internacional. No caso de Veciños, a obra coa que mañá se estrea a programación, as actrices e actores da ESADg retratarán unha veciñanza onde se misturan os personaxes máis dispares enfrontados en problemas de parella, conflitos familiares, amorosos e diferentes visións da vida. Todos eles soben e baixan as escaleiras desta comunidade de veciños un tanto peculiar. A dramaturxia parte de textos da obra Cabaret Tráxico, Opera Pánica de Alejandro Jodorowsky, e textos de Confesiones antes del fin de la era humana de Alberto García Martín. Dirixida por María Crespo, o seu elenco está formado por Sonsoles Cordón, Yago Espasandín, Yolanda Lorenzo, Iván Márquez, Ainhoa Martínez, Raúl Pérez e Jennifer Vilar.

O programa da Miteu continuará o 4 de abril coa participación da Aula de Teatro Universitario de Ourense, Maricastaña, que representará a obra As ondas das pedras no río, o 4 de abril. Uns días máis tarde, o 10 de abril, tocaralle a Aula de teatro da USC de Santiago, con Pasar por Nida. O 16 de abril será a quenda da Compañía de teatro da USC-Lugo, con WK. O 18 de abril actuará o primeiro grupo de fóra de Galicia, a Aula de Teatro Universidad Pública de Navarra, que representará Superhéroes de barrio. Posteriormente, volverán as propostas galegas coa actuación dos anfitrións, a Aula de Teatro Universitaria do campus de Vigo, que representará a peza Paraíso. Por último, pechará a Miteu, a proposta máis internacional, a que ofrecerá o ETM, de Marrocos, con El Itsmo.

No eido musical, a programación retómase o mércores 21 co Sonora 18 que, nesta ocasión, traerá unha combinación entre o rap de Malandrómeda e o garage rock de Los Bengala. Grupo compostelán formado por Hevi e o Master do son, en 2016 a Revista Rockdelux nomeou o disco dobre Os corenta e oito nomes do inimigo de Malandrómeda como mellor álbum nacional e o pasado ano gañaron na categoría hip-hop os Premios Martín Códax da música. O cartel do Sonora complétase coa actuación dun dos grupos independentes máis recoñecidos da actualidade, Los Bengala, de Zaragoza, dous músicos que logran cos seus instrumentos e as súas voces, directos contundentes.

A música continuará o 17 de abril co Concerto Ensaiamos, Colleita 2018. As bandas que este ano terán a oportunidade de pórse diante do público serán Cool Cucumbers, Undef, Lendas do Alén, Spleen e Malboro Tigers. O grupo gañador terá a oportunidade de gravar a súa primeira maqueta nos estudos da Facultade de Ciencias Sociais e da Comunicación.

Cine en versión orixinal

Completa a programación o ciclo Cine e Lingua centrado nesta ocasión na resistencia como temática das historias seleccionadas, con diferentes filmes cuxos protagonistas principais se enfrontan a duras situacións. A idea é a de achegar ao público, tanto universitario como resto de persoas interesadas, cine en versión orixinal. A primeira película en proxectarse vai ser North Country (Niki Caro, 2005). Protagonizada por Charlize Theron, este filme está baseado nunha historial real de discriminación de xénero no traballo e nel relátase a vida dunha nai solteira e o seu duro día a día como traballadora nas minas de ferro do norte de Minnesota.

A película estará presentada e moderada por Jeff Beasley, profesor do Centro de Linguas da Universidade de Vigo. Con entrada libre ata completar aforamento as proxeccións no edificio Cambón (rúa Oliva,3) prolongaranse ata principios de maio.